Hatutan.com, (14 Dezembru 2023), Díli—IX Governu Konstitusionál liu hosi Sekretáriu Estadu Komunikasaun Sosiál (SEKOMS), Expedito Loro Dias Ximenes, kongratula média online Hatutan.com no Parabeniza espesiál Xefe Redasaun Francisco Belo Símões da Costa, ne’ebé simu ona Prémiu Anti-Korrupsaun Mundiál 2023 nian, iha Estadus Unidus Amérika (EUA).

Manán na’in prémiu Anti-Korrupsaun Mundiál 2023, Xefe Redasaun Hatutan.com Francisco Belo Símões da Costa hasai foto hamutuk ho Ministru Negósiu Estranjeiru EUA, Antony Blinken no mós manán na’in 10 seluk mai hosi mundu, iha serimónia espesiál ida ne’ebé realiza iha edifísiu Ministériu Negósiu Estranjeiru AUA nian iha Washington DC, Kinta (17/11/2023) dadeer oras EUA nian no Sesta dadeer oras Timor-Leste nian. Foto: Espesiál.

Expedito Dias konsidera prémiu mundiál ne’ebé Xefe Redasaun Hatutan.com simu ne’e hatudu katak, Hatutan.com hala’o nia kna’ar di’ak, tuir nia motto Laís, Atuál no Konfiável, ne’e kapás no di’ak tebes.

Lee Mós: Pemimpin Redaksi Hatutan.com Francisco Belo Simões Raih Penghargaan Juara Anti Korupsi 2023

“Ha’u hato’o parabéns bá Hatutan.com tanba bele hetan award ida ne’ebé di’ak bá iha anti korrupsaun mundiál,” Expedito Ximenes hato’o ida-ne’e hafoin akompaña Primeiru-Ministru (PM), Kay Rala Xanana Gusmão ne’ebé arranka bá Japaun, iha Aeroportu Internasionál Nicolau Lobato, Comoro-Díli, Kinta (14/12/2023).

Governante ne’e hein katak ho prémiu mundiál ne’ebé simu, bele fó motivasaun maka’as liu tán bá Hatutan.com atu bele haree dezenvolvimentu en-jerál, espesiál, oinsá tau-matan bá prevene korrupsaun iha Timor-Leste (TL).

“Hein katak Hatutan.com nafatin halo notísia ne’ebé ke la’ós de’it hanesan notísia ida ne’ebé straight news, maibé hakle’an liu tán hanesan investigativu no feature news, atu nune’e públiku bele hatene liután katak korrupsaun ne’e moras ida ne’ebé la di’ak iha ita nia ra’in,” SEKOMS fó hanoin no enkoraza.

SEKOMS enkoraza mós média sira seluk hosi olataforma oioin hanesan jornál, rádiu, televizaun no média online sira bele halo notísia barak liután, oinsá atu bele promove informasaun bá kombate korrupsaun iha TL.

Xefe Redasaun média online Hatutan.com, Francisco Belo Simões da Costa, simu prémiu Anti-Corruption Champion 2023 iha EUA tanba ninia esforsu no orientasaun nu’udár líder másimu iha Redasaun hodi halo kobertura investigativu liga kazu lubuk ida ne’ebé iha indikasaun bá korrupsaun ne’ebé mak akontese iha Timor-Leste.

Prémiu ne’e oferese direta hosi Ministru Negósiu Estranjeiru EUA, Antony Blinken iha serimónia espesiál ida ne’ebé realiza iha edifísiu Ministériu Negósiu Estranjeiru AUA nian iha Washington DC, Kinta dader  oras EUA nian no Sesta dadeer oras Timor-Leste nian.

“Francisco Belo Simões da Costa hanesan Anti-Corruption Champion 2023  bá ninia servisu makas no la hatene kolen hodi halo no fó orientasaun kobertura investigativu bá kazu korrupsaun lubuk ida inklui Projetu Dijitâl Transmisaun Multimedia Terrestre Avansadu (DTMB-A) Rádiu  Televizaun Timor-Leste. Kobertura investigativu ida-ne’e sai hanesan mata-dalan bá Komisaun Anti Korrupsaun hodi halo investigasaun kle’an,” Antony Blinken hateten iha serimónia atribuisaun prémiu ne’e.

Prémiu Anti-Corruption Champion ne’e  realiza desde tinan 2021 no kada tinan Ministériu Estranjeiru EUA nian sei kontinua oferese prémiu internasionál ne’e bá sira ne’ebé mak eleitu ka selesionadu mai hosi mundu tomak liga ho esforsu no dedikasaun kontra korrupsaun iha sira nia nasaun no mós mundu. 

Governu Amerikanu ne’ebé lidera hosi Jose Biden iha inisiativa hodi estabelese Anti-Corruption Champions Award iha tinan 2021 atu hatudu “solidariedade AEUA nian no komitmentu Governasaun Biden nian kontra Korrupsaun”.

Alende Xefe Redasaun Hatutan.com Francisco Belo Simões da Costa, Ministru Negósiu Estranjeiru EUA nian mós oferese prémiu ne’ebé hanesan bá manan na’in-10 seluk, Anti-Corruption Champion tinan ne’e nian bá sira nia luta kontra korrupasaun.

Sira ne’e mak hanesan Veronica Mihailov-Moraru hosi Moldova, Stanislau Ivashkevick hosi Belarus, Vladimir Novović, hosi Montenegro, Ali (Mukhammedali) Toktakunov hosi Republik Kyrgyz, Luis Arturo Torres Ramírez hosi Ekuador, May De Silva hosi Seychelles, Marc N. Kollie hosi Liberia, Jean-Claude Mputu hosi Republik Kongo, Nikhil Dey hosi India no Annette Planells hosi Panama.

Desde Prémiu dahuluk iha tinan 2021 eziste, iha ona ema na’in 32 ne’ebé mak simu ona prémiu ne’e.

Jornalista: Rogério Pereira Cárceres