Hatutan.com, (15 Janeiru 2024), Díli—Iha Sesta (12/01/2024) haleu tuku 02:30 madrugrada, mosu kazu insidente ida iha ne’ebé ema deskoñesidu bá sunu mutuk motór tolu ne’ebé para hela iha uma ida iha área Ailok-Laran, Suku Bairru-Pité, Postu Administrativu Dom Aleixo, Dili.

Ema deskoñesidu sunu mutuk motór tolu iha área Ailok-Laran, Suku Bairru-Pité, Postu Administrativu Dom Aleixo, Dili, Sexta (12/01/2024) madrugrada. Foto: Facebook.

Motór tolu ne’ebé sunu mutuk hosi ema deskoñesidu ne’e ho marka sira mak hanesan, Honda Beat ida, Vario kór mean ida, no Revo Fit ida.

Lee Mós: Kazu Na’ok Motór, Forsa Konjunta Kaer-tán Supeitu 11 Inklui Na’in bá Ofisina Modifikadór

Komandante PNTL Munisipiu Dili, Superintendente Xefe Polisia Orlando Gomes informa, kazu insidente ne’e mosu duni iha área Ailok-Laran no kazu ne’e akontese bainhira motór na’in sira para hela iha viziñu ida ninia uma, tanba sira-ninia uma iha foho-lolon oitoan, nune’e, motor labele sa’e.

“Bainhira akontese motorizada ninia na’in sira mós la hatene. Ema sé loos mak sunu, tanba sira ninia uma distánsia dook oitoan hosi fatin ne’ebé sira para motor bá. Ema deskoñesidu mak bá sunu tiha motor tolu ne’e no depois de sunu motor mak sira hakfodak halai mai, mais ema halai lakon tiha,” Komandante Orlando Gomes informa iha kna’ar fatin Caicoli, Segunda (15/01/2024).

Vítima sira hato’o ona keixa iha Komandu PNTL Munisipiu Dili no polisia lansa ona ekipa sekreta sira hodi tuir autór, nune’e bele prosesa bá oin, tuir dalan legál.

“Agora dadaun polisia foti ona sira ninia deklarasaun sira ne’e, hotu ona, ita komesa ona halo prosesu, no lansa ona ema para buka nafatin suspeitu sira ne’e. Evidénsia sira ne’e agora ita asegura hela nune’e ita bele kontinua prosesu,” Orlando Gomes hateten.

Jornalista: Rogério Pereira Cárceres