Hatutan.com, (23 Janeiru 2024), Díli– Membru Parlamentu Nasionál (PN) hosi Bankada FRETILIN, Dario Madeira, Tersa (23/01/2024),  hato’o preokupasaun komunidade Viqueque nian iha plenária relasiona ho kondisaun estrada Lugatoi iha Munisípiu Viqueque Vila ne’ebé  fó ameasa bá komunidade sira-nia movimentu.

Lee Mós: Suku Tolu iha Viqueque-Vila Enfrenta Problema Barak

Kondisaun Estada iha Viqueque Vila fó ameasa bá movimentu komunidade. Foto/Foti Hosi Facebook

“Husu bá ministru atu tau matan lalais bá estrada ida iha Viqueque Vila problema ne’e ha’u levanta dala-barak ona, estrada Lugatoi ne’e agora daudaun bus no karreta movimentu kapitál ninia ne’e la la’o tanba rai monu,” Deputadu Dario Madeira hateten iha nia intervensaun iha plenária PN.

Deputadu ne’e mós haktuir problema ne’e kle’ur tiha ona no komisaun E ne’ebé trata asuntu Infra-Estrutura halo ona fiskalizasaun bá estrada refere. Nune’e, informasaun ne’ebé sira iha katak, IX Governu halo ona adjudikasaun direita bá kompañia balu atu halo servisu, maibé to’o agora seidauk halo servisu iha ne’ebá.

Deputadu ne’e  husu Governu atu aselera prosesu ida-ne’e para bele normaliza lalais estrada Lugatoi. Ho nune’e,  Vise-Ministru asuntu Parlamentár Áderito da Costa Hugo haktuir nia  sei relata asuntu refere bá Obras públiku hodi haree.

“Liga ho asuntu ne’ebé deputadu Dario Madeira foti estrada iha Viqueque Vila sé la sala fulan hirak liubá ha’u halo ona aprezenta ne’e kategoria emerjénsia no ha’u hatene katak sira halo ona adjudikasaun direita no kompañia seidauk halo atividade iha terrenu no  ha’u agradese bá deputadu tanba halo observasaun ida-ne’e admita bá obras públiku  hodi haree asuntu ida-ne’e,” Vise-Ministru asuntu Parlamentár Áderito da Costa Hugo haktuir mós iha plenária PN.

Jornalista Estajiária : Zita Menezes