Hatutan.com, (08 Fevereiru 2024), Díli– Governu liuhosi Ministériu Prezidénsia Konsellu Ministru (MPCM) no  Sekretária Estadu Komunikasaun Sosiál (SEKOMS), Kinta (08/02/2024), estabelese hikas kontratu servisu faze daruak nian ho mídia 15  hodi divulga no dezemina informasaun bá povu iha nasionál, munisípiu to’o postu administrativu.

Lee Mós: Akordu Kooperasaun SEKOMS ho Mídia Sira Hamosu Dúvida

Reprezentante Hatutan.com, Laurentina Pires de Jesus asina akordu kooperasaun ho Governu liuhosi MPCM ho SEKOMS iha Pálasiu Governu, KInta (08/02/2024). Foto/Elio dos Santos da Costa

Iha loron 31 fulan-Agostu 2023, SEKOMS asina akordu kooperasaun ho mídia imprime lima (5) hanesan faze dahuluk bá programa apoia IX Governu Konstitusionál nian bá fortalesimentu mídia sira.

Kontratu ho mídia imprime sira ne’ebé nia durasaun to’o fulan-Dezembru 2023 distribui jornál  bá to’o postu administrativu. Nune’e, iha loron hirak tuir mai, SEKOMS mós estabelese akordu ho plataforma online sira liuhosi apoiu indireta hodi monta publisidade ka iklan iha mídia online sira ho presu ne’ebé parte sira konkorda hamutuk.

“Molok atu asina akordu ne’e, ami kriá ekipa ida halo monitorisazaun,  ekipa ida halo levantamentu no ekipa ida halo avaliasaun tantu durante IX Governu ninian ita fó apoiu bá mídia imprime, mídia eletrónika ho plataforma online no dijital sira ne’ebé prense rekejitu,” Sekretáriu Estadu Komunikasaun Sosiál Expedito Dias Ximenes  hateten bá jornalista sira iha Pálasiu Governu,

Iha kontratu ida-ne’e SEKOMS sei kontrolu maka’as, iha fulan-neen nia laran, bainhira mídia sira la fó benefísiu dezemina informasaun bá públiku, SEKOMS sei hapara sira nia kontratu.

“Ami nia ekipa halo kontrolu maka bainhira jornál sira haruka bá iha munisípiu no Postu-Administrativu iha ne’ebá iha tanda terima sé maka simu no ema ne’e lee ka lae, ami halo avaliasaun hosi levantamentu ne’ebé maka ami halo hatudu katak populasaun sira hetan duni jornál no sira lee duni. Agora kona-bá televizaun privadu no plataforma online sira ne’e ita halo tanba hosi produtu jornalistiku sira ne’ebésira fó sai no produsaun ne’ebé SEKOMS produz rasik. Durasaun kontratu ne’e tinan ida, no hosi avaliasaun ekipa iha munisípiu hatudu katak barak liu ne’e povu lee, iha uituan dalabarak sira haluha atu haruka bá tanba ne’e maka enkontru tékniku ho mídia na’in sira fó hatene kedan sé bainhira maka iha avaliasaun fulan-neen maka jornál la to’o iha povu nia liman maka ami sei hapara,” Expedito Dias Ximenes afirma.

Reprezentante Hatutan.com, Laurentina Pires de Jesus asina akordu kooperasaun ho Governu liuhosi MPCM ho SEKOMS iha Pálasiu Governu, KInta (08/02/2024). Foto/Elio dos Santos da Costa

Kontratu ne’e parte  Ministériu Prezidénsia Konsellu Ministru (MPCM) maka sei haree prosesu administrasaun finansa hotu  no asina kontratu ho mídia sira ne’e  parte MPCM tuir lei finansa nian.

Expedito Loro Dias Ximenes haktuir iha média balu ne’ebé seidauk asina kontratu ho SEKOMS ne’e tanba seidauk prienxe rekejitu hanesan sira iha streaming, maibé sira laiha studiu

“Ha’u fó ezemplu hanesan SM-News, Hatutan.com sira iha estudiu sira iha streaming, maibé sira iha studio tanbasa maka tenki iha estudiu tanba bele bolu ema hodi halo entrevista ne’e dezemina informasaun.  Sira hirak seidauk iha estudiu ne’e maka seidauk bele halo kontratu la’ós halo deskriminasaun,” nia espliká

Mídia sira ne’ebé asina kontratu ho Governu mak hanesan Timor-post, STL, Tatoli.I.P, RTTL,E.P Hatutan.com, Média LABEH, Média ONE Timor, Indepedente, Dili Post, GMN-TV, Lafaek News, Média Mudansa, SM-News, Gardamor-TV no  TV-E.

Jornalista: Zita Menezes