Hatutan.com, (07 Marsu 2024), Díli—Tinan ida ne’e, Ministériu Agrikultura, Pekuária, Peska no Floresta (MAPPF) sei normaliza irrigasaun sira ne’ebé mak durante ne’e hetan estragus no sei konstrui tán irrigasaun tolu hodi hasa’e produsaun hare iha rai-laran.

Ministru Agrikultura, Pekuária, Peska no Floresta (MAPPF), Marcos da Cruz.

“Atu hatama bee bá natar ida ita mobiliza ita nia eskavadór bá ke’e bee dalan atu nune’e bele lori bee tama bá natar sira ne’ebé durante ne’e abandonadu. Ida fali ita mobiliza eskavadór bá normaliza kanu sira ne’ebé durante ne’e funsiona, maibé tanba udan-boot entaun estraga fali. Ne’e mós ita mobiliza eskavadór bá normaliza no nomós ita funsiona didi’ak fali irrigasaun boot sira hanesan irrigasaun iha Laleia, Vemasi,  Baguia, Bebui Uatulari, Oebaba Suai no Maliana,” Ministru Agrikultura, Pekuária, Peska no Floresta (MAPPF), Marcos da Cruz informa asuntu ne’e hafoin halo audiénsia ho Komisaun D iha PN, Kinta (07/03/2024).

Lee Mós: Mota Laueli Sobu Irrigasaun ho Natar iha Asulau-Sare

Marcos da Cruz haktuir, iha fulan hirak liu bá bainhira udan-boot halo bee-boot estraga kanu barak, ne’e duni buat ne’ebé Governu halo maka mobiliza eskavadór sira ne’ebé iha bá normaliza irrigasaun sira ne’e hodi bele fornese fali bee bá iha natar sira ne’ebé abandonadu.

Irrigasaun ne’ebé kanaliza bee ba natar hektares 75 iha aldeia Raimate Suku Asulau-Sare, Postu Administrativu Hatulia, Munisipiu Ermera, (29/01/2022). Foto/Hatutan.com.

Ministru ne’e mós husu bá agrikultór sira ne’ebé mak iha natar bainhira bee tama ona husu atu sira mós bele tama iha sira nian natar hodi bele halo no labele abandona.

“Realidade ne’ebé hatudu iha fatin barak bee tama ona, maibé agrikultór sira mak seidauk tama halo natar. Ida-ne’e hanesan obstákulu ida mai ita hodi oinsá bele aumenta produsaun rai laran. Ita fiar katak kuandu ita servisu hamutuk bele konsiensializa ita nia agrikultór sira bele bá halo natar,” nia hateten.

Konstrui Irrigasaun Boot Tolu

Tuir planu, iha tinan ida-ne’e MAPPF sei konstrui tán irrigasaun boot tolu hodi bele ajuda komunidade sira ne’ebé durante ne’e bee laiha.

Irigasaun barak maka seidauk iha kondisaun di’ak maibé MAPPF haree katak, balun maka  hadi’a ona ho kustu osan boot hodi hadi’a. 

MAPPF sei halo tán irrigasaun balun ne’ebé mak presiza halo hanesan agora daudaun halo hela irrigasaun boot rua, ida ho naran Galata iha área Venilale no ida iha Laivai Baucau halo daudaun ona.

Tinan ida-ne’e MAPPF iha ona orsamentu atu halo irrigasaun boot tolu, ida iha Maliana dois no ida hanaran Uatuwa iha área Baucau Uailili Gariwai nian no mós ikus liu ida iha Irrabere Uatucarbau.

“Ida-ne’e bá tinan ida-ne’e atu tama bá iha tenderizasaun. Bainhira tender ne’e iha hotu ona kompañia bele halo, ita espera katak tinan hirak mai bele ajuda hodi fornese bee bá iha povu nian natar atu bele aumenta produsaun,” nia espera.

Osan nia montante Ministru ne’e la lembra maibé osan boot tanba irrigasaun ida-idak ne’e kuaze iha montante millaun $5-resin.

Oras ne’e daudaun MAPPF hahú mobiliza mekaniku sira hodi identifika tratór sira ne’ebé durante ne’e aat no abandona hodi hadi’a fali traktór sira ne’e hodi ajuda agrikultór sira atu hasa’e produsaun hare.

Agora mós MAPPF iha traktór foun hamutuk 25 no fó ona bá iha munisípiu no aban mós sei fó bá iha Suai, Same, Manatuto no seluk tán.

Jornalista Estajiária: Zita Menezes