Hatutan.com, (13 Marsu 2024), Díli—Prezidente Repúblika (PR), José Ramos-Horta fó posse bá Embaixadór Dezignadu Timor-Leste (TL) bá Republika Cuba Nívio Magalhães no Embaixadora Laura Abrantes bá Comunidade dos Paises de Lingua Portuguesa (CPLP).

Prezidente Repúblika (PR), José Ramos-Horta fó posse bá Embaixadór Dezignadu Timor-Leste (TL) bá Republika Cuba Nívio Magalhães no Embaixadora Laura Abrantes bá Comunidade dos Paises de Lingua Portuguesa (CPLP), iha Palásiu Prezidensiál Nicolau Lobato Bairru-Pité, Kuarta (13/03/2024). Foto: Elio dos Santos da Costa.

Vise-Ministra Asuntu ASEAN, Milena Rangel bá jornalista sira iha Palásiu Prezidensiál Nicolau Lobato Bairru-Pité, Kuarta (13/03/2024) hateten, Prezidente Repúblika (PR), José Ramos-Horta fó posse bá embaixadór na’in-rua, embaixadór Dezignadu ba República Cuba, Nívio Magalhães no Embaixadora Dezignadu ba CPLP, Laura Abrantes.

Lee Mós: Prezidente Repúblika Simu Karta Kredensiál Hosi Nasaun 11

Milena Rangel afirma, Timor-Leste hola parte iha organizasaun CPLP hanesan pais Lian Portuguesa no mos iha relasaun forte tebe-tebes ho Cuba, kooperasaun entre Cuba ho Timor-Leste iha area oin-oin, inklui iha saúde, edukasaun no mós seluk-seluk tán.

Tanba ne’e, presiza tebes-tebes  prezensa embaixadór foun hodi troka embaixadór ne’ebé remata ona nia mandatu iha Cuba.

“Ita ho Cuba desde inisiu kedan ita estabelese relasaun automátika. Cuba desde inisiu kedan ita sempre iha relasaun di’ak. Ita iha kooperasaun boot tebes iha área saúde, ita nia médiku sira lubuk  ida mak formadu  hosi Cuba desde ita restaura ita nia independénsia no mós agora extende tán kooperasaun iha área sira seluk hanesan  edukasaun iha mós kultura no iha mós agrikultura no seluk tan. Ne’ebé, prioridade atu ba fó kontinuasaun bá programas ezistente sira no atu hametin liu tan relasaun pais rua ne’e,” Milena Rangel hateten.

Prezidente Republika hanesan Xefe Estadu fó mensazen bá  embaixadór foun sira atu bele servisu di’ak liu tán, bele hametin liu  tán kooperasaun sira ne’ebé iha, assegura atu kooperasaun sira ne’e lori duni benifisiu ba dezenvolvimentu TL.

Bainhira maka atu arranka, nia dehan, normalmente agora iha prossesu administrativu nia laran, dala ruma bele lori fulan ida ka rua, maibé bele bá bainhira de’it ho Ministériu Negósiu Estranjeiru sei trata assunu administrativu balun, presiza finaliza lai antes embaixadór na’in-2 arranka bá Portugál no ida seluk ba Cuba.

Normalmente embaixadór sira mandatu tinan tolu, mais iha posibilidaee halo extensaun kuandu iha nesesidade.

Iha fatin hanesan, embaixadór dezignadu bá República Cuba,  Nívio Magalhães hateten dahuluk hakarak agradese bá Prezidente Repúblika no  Primeiru Ministru no membru Governu tomak ne’ebé depozita komfiansa hodi hala’o knaar hanesan Embaixadór Timor Leste bá Cuba, ondra no previléiju boot tebes ba nia atu assume responsablidade ida-ne’e.

Nia afirma, Cuba la’ós nasaun foun mai Timor Leste, Iha Cuba nia kontribuisaun ba Timor Leste boot tebes hahu TL luta ba ukun rasik aan nomós hanesan ema hotu hatene katak bainhira Timor restaura nia indepedensia Cuba hanesan hanesan nasaun daruak neebé establese ho relasaun diplomasia ho TL.

“Tanba ne’e mak ho responsablidade ne’ebé ha’u simu ha’u sei kontinua relasaun bilateral no kontinua koperasaun ne’ebé durante ne’e establese ona,” nia hateten.

Embaixadór ne’e mós komprometidu atu dedika nia an tomak no assegura esforsu tomak atu nune’e misaun ida-ne’e bele susesu.

Nune’e mós embaixadora Dezignadu bá CPLP, Laura Abrantes agradese tebes no profundus gratidaun ba Prezidente Repúblika José Ramos-Horta no misaun ida ne’e sai hanesan responsabilidade ida.

“Ha’u fiar katak ha’u sei esforsa makas hanesan marka istoria ne’ebé mak ohin ha’u hetan, sei halo iha misaun, entaun misaun ne’ebé mak ha’u sei halo maka fo kontinuidade ba saida mak antesesor sira hala’o ona,” nia hateten.

Jornalista: Vito Salvadór