Hatutan.com, (18 Marsu 2024), Díli– Autoridade Protesaun Sívil (APC-sigla portugés), Centro Nacional de Operações Protecção Sívil (CNOPC), rejista uma hamutuk 146 hetan estragu kauza hosi udan-anin ho intensidade forte ne’ebé akontese durante semana ida iha territóriu nasionál.

Uma hetan estragu kauza hosi udan-anin boot iha teritóriu nasional. Foto/APC

“Hahú hosi loron 12 to’o loron 18, fulan-Marsu 2024, durante semana ida ne’e, iha rejiaun Timor-Leste normál, no akontese tipu dezastre mak CNOPC rejistu hamutuk 146 mak hetan estragu, no abitante ida mate,” Xefe Seksaun Relasaun Externa-APC, Nelson Nunes Orleans, informa bá jornalista sira liuhosi konferénsia imprénsa ne’ebé hala’o iha Salaun Konferénsia APC iha Caicol, Díli, Segunda (18/03/2024).

Uma 146 ne’ebé hetan estragu ne’e, kompostu hosi  Munisípiu Aileu, anin sobu uma-lima (5), Ainaro anin sobu uma-ida (1), Ataúro anin sobu uma-ida (1), Baucau anin sobu uma-tolu (3), Bobonaro anin sobu uma-rua (2), Covalima anin sobu uma-ida (1), Díli anin sobu uma-rua (2).

Iha Munisípiu Ermera, anin sobu uma-neen (6), Lautém anin sobu uma-haat (4) no ahi-han uma-ida (1), Liquiça anin sobu uma-42, Manufahi anin sobu uma-rua (2), RAEOA anin sobu uma 14 no inundasaun 55, rai-halai estraga uma-rua (2), no ahi han uma-tolu (3), Viqueque  anin sobu uma-rua (2) no mate ida (1).

“Bá vítima sira ne’e, APC  servisu mós ho autoridade munisípiu sira hotu halo atendimentu lalais bá vítima sira, tanba sira presiza tebes hosi parte APC nia tulun, entaun, apoiu hahan ho la’ós ai-han ne’e ajuda kedas bá iha primeiru maka, apoiu emerjénsia nian,”  nia informa.

Kona-bá vítima hira mak sira-ninian uma estragu totál no presiza hetan apoiu rekuperasaun, Nelson Nunes Orleans esplika, normalmente kuandu mosu dezastre, sira-nianekipa tun bá halo uluk verifikasaun dadus iha terrenu. Iha prosesu ida -e’e, fahe bá tipu tolu mak hanesan, aat natoon, aat kaman no aat totál.

Hafoin prosesu ida ne’e maka, foin bele hatene, uma hira mak estragu totál, hodi bele hetan rekuperasaun hosi Governu. Maibé, tanba prosesu verifikasaun bá dadus bá tinan 2024 nian seidauk konklui, nune’e ekipa sira sei presiza tán tempu hodi re-verifika.

Estóke Ai-han Sufisiente

Xefe Seksaun Relasaun Externa-APC ne’e saliente, dadaun ne’e estóke ai-han no la’ós ai-han nian (food ho non-food) sei sufiente iha armájen APC nian, iha nasionál inklui mós iha munisípiu sira, hodi bele atende populasaun sira ho karákter emerjénsia, uainhira enfrenta problema dezastre naturál inundasaun, anin-boot, erozaun (rai-halai), ka inséndiu ruma.

Jornalista: Rogério Pereira Cárceres