Hatutan.com, (23 Abríl 2024), Díli– Membru Parlamentu Nasionál hosi  Bankada CNRT, Saul Salvador, liuhosi sesaun plenaria PN, Tersa (23/04/2024),  aprezenta preokupasaun agrikultór sira   Suku Raimea, Postu Administrativu Zumalai, Munisípiu Covalima, kona-bá fenómenu peste gafañotu atake hare ho batar sira.

Lee Mós: Povu Covalima Presiza Tebes Estrada

Gafañotu. Foto/Foti hosi Google

Komunidade sira iha Suku Raimea laran susar tebes bá fenómena ne’e tanba peste gafañotu    estraga hutu sira nia hare sira iha natar laran no batar sira iha  to’os laran hodi halo sira la konsege koleta. Ho nune’e, husu bá Ministru Agrikultura Peska Pekuáriu n Floresta (MAPPF) atu tau atensaun bá asuntu ida-ne’e atu bele proteje agrikultór sira nia produtu natar ho to’os.

Dadus hosi Servisu Agrikultura Munisípiu Covalima nian hatudu katak batar ektare 100 iha Zumali, Penerema no Oebaban la bele koleta ho di’ak tanba hetan estragu hosi peste gafañotu.

Vise-Ministru asuntu Parlamentár Áderito da Costa Hugo ne’ebé reprezenta Governu iha plenária PN promete  relata asuntu ne’e bá Ministériu Agrikultura Peska, Pekuáriu no Floresta atu bele buka solusaun bá asuntu ne’e rasik.

Jornalista Estajiária: Zita Menezes