Hatutan.com, (30 Abríl 2024), Díli- Prezidente Repúblika (PR), José Ramos-Horta hateten traballadór sira sai nu’udár kabas bá ekonomia, tanba ne’e, tenke rekoñese esforsu traballadór hotu ne’ebé kontribui bá dezenvolvimentu ekonómiku no sosiál iha Timor-Leste.

Lee Mós: 2024, Governu Hasa’e Saláriu Mínimu Hosi $115 bá $150

Prezidente Repúblika, José Ramos-Horta. Foto/Elio dos Santos

Mensajen Prezidente Repúblika José Ramos-Horta  nian ne’e hato’o relasiona ho  loron internasional traballadór  sira-nian ne’ebé komemora iha  kada tinan iha loron 01 fulan-Maiu.

Loron 01 fulan-Maiu mak data signifikante ida bainhira fó onra no selebra kontribuisaun husi traballadór sira iha mundu tomak. Loron Internasionál Traballadór nian hanesan oportunidade ida bá traballadór sira iha nivel globál atu hamutuk iha solidariedade, halibur hamutuk hodi selebra rezultadu servisu no rekoñese progresu ne’ebé halo hodi hadi’a kondisaun servisu nian.

“Iha loron Internasionál Traballadór nian, ita hateke bá oin ho orgullu bá progresu ne’ebé ita hetan ona ba traballadór sira iha Timor-Leste. Ami rekoñese esforsu boot husi traballadór hotu ne’ebé kontribui bá dezenvolvimentu ekonómiku no sosiál iha ita-nia nasaun joven ida ne’e,” Prezidente Repúblika José Ramos-Horta hateten iha komunikadu imprensa ne’ebé Hatutan.com asesu, Tersa (30/04/2024).

Sei iha servisu atu halo, tenke garante katak traballadór hotu iha empregu ne’ebé seguru, kondisaun digna no iha kapasidade atu sustenta sira-nia família ho adekuadu. Tenke kontinua  defende direitu traballadór sira-nian no asegura oportunidade ne’ebé hanesan ba hotu-hotu ka ema hotu.

“Ohin loron, ita selebra loron traballadór, serbisu maka’as, dedikasaun no sakrifísiu sira husi traballadór sira iha nasaun ne’e. Traballadór sira sai nu’udar kabas ba ekonomia no dezenvolvimentu Timor-Leste nian. Liu husi ita-nia servisu maka’as no esforsu loroloron nian, ita-nia nasaun sei la’o ba oin,” Ramos-Horta hateten iha komunikadu ne’e.

Unidu iha esforsu sira, bele harii Timor-Leste ida-ne’ebé forte liu, prósperu liu, no ida-ne’ebé ekuitativu liu ba traballadór hotu-hotu no sira-nia família.

Xefe Estadu deseju bá traballadór  sira hotu kontente ksolok bá selebrasaun Loron Traballadór nian, nakonu ho pás no ksolok, no hein katak tinan oin mai sei lori prosperidade no progresu barak liután.

Hasa’e Saláriu Minimu Sei Fó Impaktu bá Fundu Petróleu no OJE

Xefe Bankada PLP iha PN, Maria Angelina Sarmento. Foto/Tome da Silva

Husi sorin seluk, membru Parlamentu Nasionál nu’udár mós Xefe Bankada PLP, Maria Angelina Sarmento, afirma antes atu hasa’e saláriu minimu bá traballadór sira iha Timor-Leste, Governu tenke  halo uluk estudu viabilidade ekonómiku, se lae, bele fó impaktu bá fundu petróleu.

Deputada Maria Angelina Sarmento hateten normalmente atu hasa’e saláriu minimu Governu tenke halo uluk estudu ekonómiku no estudu viabilidade sobre hasa’e saláriu minimu ne’e fó impaktu bá ekonomia ka lae, atu nune’e, Governu bele hatene katak sei laiha risku kuandu hasa’e saláriu minimu bá traballadór sira.

“Sé ita hasa’e saláriu minimu mak ita seidauk iha fonte reseita la sura husi fundu petrolíferu entaun ha’u hanoin Governu tenke pondera lai, se lae, to’o tinan 10 mai ita nian fundu mina-rai ezgotadu ita sei labele tán sustenta mákina estadu, ne’ebé kada tinan saláriu minimu aumenta sei fó todan mós bá ita nian orsamentu jerál estadu,” Maria Angelina haktuir bá jornalista sira iha PN.

Nia afirma katak iha parte seluk bá setór formal hanesan funsionáriu públiku hasa’e saláriu minimu ne’e bele, maibé sé Timor-Leste nia fonte únika ne’ebé deferénsia ne’e mak fundu mina-rai de’it dalaruma Governu tenke pondera lai.

Setór informal sira no traballadór sira iha setór privadu sé kompañia sira ekonómikamente iha kapasidade no finanseiru atu hasa’e saláriu minimu sira bele propoin bá Governu atu halo lei ida para hasa’e saláriu minimu bá traballadór setór privadu sira para bele asegura katak iha inkuadramentu legál.

Iha fatin hanesan deputadu Bankada CNRT Natalino dos Santos hato’o parabéns bá komemorasaun loron mundiál traballadór iha mundu tomak liuliu iha Timor-Leste tanba hakarak nasaun dezenvolvolve tenke  iha kontribuisaun husi traballadór sira iha setór hotu-hotu.

Membru PN hosi Bankada CNRT, Natalino dos Santos. Foto/Zita Menezes.

“Husu Governu no  SEFOPE atu haree no garantia traballadór sira nia direitu no devér. Tanba ida-ne’e tempu to’o ona atu Governu haree oinsá saláriu minimu bá traballadór sira tanba ita haree katak nesesidade vida moris nian agora karun, taxa mós sa’e no oinsá kriá kondisaun kampu traballu bá sira no bele hetan regalia ruma husi Estadu,” Deputadu Natalino dos Santos haktuir iha PN.

Nia propoin mós Parlamentu Nasionál atu haree oinsá halo melloramentu bá saláriu minimu iha Timor-Leste karik bele haree fila-fali bá lei traballadór nian atu garante sira nian direitu ka saláriu minimu.

“Atu hasa’e bá hira ne’e depende bá Governu atu sukat bá kreximentu ekonómiku iha Timor-Leste ne’e sa’e oinsá. Maibé hakarak ka lakohi minimu tenke hasa’e duni tanba vida moris ne’e karun liu no   saláriu $115 ne’e ki’ik liu no Governu tenke haree hodi fó solusaun,” Deputadu Natalino dos Santos hateten.

Jornalista: Vito Salvadór/ Zita Menezes