Hatutan.com, (06 Juñu 2024), Díli- Jornalista timoroan  na’in-12   kompleta ona formasaun kona-bá reportajen kle’an ka In-depth reporting durante loron-haat (4)  ne’ebé oferese husi  ABC International Development servisu hamutuk ho Conselho Imprensa (CI) Timor-Leste.

Lee Mós: CI-ABC International Development Fasilita Formasaun In-depth Reporting bá Jornalista 12

Jornalista husi Hautan.com, Vito Salvadór simu sertifikadu husi formador ABC International Development hafoin termina formasaun reportajen kle’an ka in-depth reporting durante loron 4 iha Díli. Foto/CI

Jornalista na’in-12 ne’e hahú sira-nia formasaun reportajen kle’an iha loron 03 to’o loron 06 fulan-Juñu 2024. Sira-hirak ne’e mai husi Radio Televizaun Timor-Leste,  Empreza Públiku (RTTL.E.P) na’in-haat (4), Grupu Media Nasionál (GMN), na’in-ida (1), Jornál Diáriu Dili Post na’in-ida (1), Timor Post na’in-ida (1), Jornal Independente na’in-ida (1), Online Neon Metin na’in-ida (1), Radio Liberdade na’in-ida (1), Media Mudansa na’in-ida (1) no Hatutan.com jornalista na’in-ida (1).

Iha serimónia enserramentu formasaun ne’ebé hala’o iha Salaun Palm Business and Trade Centre, SurikMas ne’e, Sekretáriu Estadu Komunikasaun Sosiál (SEKOMS), Expedito Dias Ximenes fó parabéns ba jornalista Timoroan hamutuk 12 ne’ebé kompleta ona formasaun kona-ba In-depth reporting.

SEKOMS  Expedito Dias Ximenes fó  mós parabéns mos ba CI no ABC International Development ne’ebé oferese treinamentu ne’e no tuir nia reportajen In-depth kada loron iha kna’ar jornalista sira nian halo hela ida-ne’e, maibé nia konseitu no funsaun prinsipál karik kolega jornalista sira foin mak aprende iha treinamentu ida ne’e.

In-depth reporting ka iha Tetum dehan reportajen kle’an signifika nia baze ba kode etika jornalizmu nian. In-depth reporting mós katak reportajen ne’ebé halo ne’e kl’ean tebe-tebes, katak iha kazu balun ne’ebé jornalista sira hetan iha komunidade ka públiku informa ba jornalista, no jornalista la konsumu de’it ida ne’e ba straight news,  maibé buka halo balansu ho prinsípiu ida cover both side ka kobre parte hotu atu iha balansu ho dalan konfirma fontes hotu-hotu relasiona ho kazu ka akontesimentu ne’ebé iha.

Ho In-depth reporting ne’ebé dia’k no tuir prinsípiu cover both side, tuir Exepdito, sei oferese ba públiku informasaun ida ne’ebé kompletu, nakonu ho fakts no la halo ema kompriende ho informasaun ne’ebé media no jornalista sira oferese.

“Tamba ita hanesan jornalista atu kompleta ita nia reportajen In-depth ne’e mak tenke halo check and recheck, katak verifika fila fali molok publika. Tamba ne’e maka treinamentu ida In-depth reporting ne’e importante teb-tebes,” Expedito Dias Ximenes hateten.

Ho In-depth reporting, Jornalista iha kspasidade atu investiga, no investigasaun ne’ebé jornalista sira halo iha istória ka reportajen ida la’ós atu lori ba kesar fali iha Ministériu Públiku (MP) no Comissão Anti Corrupção (CAC), maibé oinsá mak ida ne’e bele sai informasaun ida klea’n ho dadus kompletu para sai konsumu públiku no parte kompetente mak iha kna’ar atu halo atuasaun tuir sira nia kompeténsia no jornalista kontinua ho nia servisu sira ne’ebé bele kontribui ba prosesu demokrasia iha Timor-Leste.

“Ha’u lori Governu nia naran kontente los ho imi nia treinamentu ida ne’e tamba imi mai husi Media Nasionál oin-oin. Hanesan membru Governu ne’ebé tau matan ba iha komunikasaun sosiál, ami haree katak ida-ne’e importante no Governu mós hakarak atu formasaun sira nune’e kontinua hodi hasae kapasidade jornalista sira nian atu bele fornese servisu di’ak liután ba públiku.” Expedito tenik.

Prezidente CI, Otelio Ote hateten kapasidade ba hakerek notísia ne’e sai nu’udár abilidade ida ne’ebé jornalista sira halo tiha ona kada loron. Iha treinamentu ba In-depth reporting nian ne’ebé partilla husi formador sira husi ABC International Development atu hametin tan koñesimentu ne’ebé jornalista sira iha onaa no kapasita liután jornalista sira atu bele halo servisu ho profesional no independente.

“Desde uluk kedas ha’u sempre dehan katak formasaun ba jornalista sira ne’e importante no bainhira iha formasaun ruma iha área jornalizmu imi mak tenke foti liman uluk atu tuir, tamba aprende ne’e la iha fronteira,” Otelio Ote hateten.

Director of Engagement ABC International Development, Aaron Kearney hateten ABC International Development iha planu atu kontinua servisu hamutuk ho CI ba oin hodi nafatin kontinua oferese formasaun ba jornalista sira.

Nia afirma ABC International Development explora hela oportunidade sira atu kontinua servisu hamutuk iha futuru, no ABC International Development kontente fo formasaun ba jornalista Timoroan sira.

“Ami kontente fo formasaun ba jornalista Timoroan sira, no ABC International Development sei servisu hamutuk nafatin ho CI ba too tinan oin, atu kontinua fo kapasitasaun ba jornalista sira,” Aaron Kearney haktuir.

Durante treinamentu In-depth reporting loron haat ne’e jornalista Timoroan sira ne’ebé partisipa iha formasaun ne’e ativu iha diskusaun ho formador sira hodi aprende no hakle’an sira nia koñesimentu iha área In-depth reporting.

Jornalista: Vito Salvadór