Hatutan.com, (14 Juñu 2024), Díli – Treinadór Prinsipál Sistema Komandu Insidente (ICS) Timoroan hamutuk na’in 39, kompostu husi  feto na’in-neen  (6) ho mane 33, gradua ona husi programa ida ne’ebé apoia husi Estadus Unidus Amérika nia Ajénsia ba Dezenvolvimentu Internasionál (USAID).

Lee Mós: USAID Investe Millaun $15 bá Program Avansu Sistema Ai-han no Nutrisaun iha TL

Timoroan na’in-39 gradua ona husi programa ida ne’ebé apoia husi Estadus Unidus Amérika nia Ajénsia ba Dezenvolvimentu Internasionál (USAID). Foto/USAID

Programa Sistema Komandu Insidente (ICS) hanesan aproximasaun padronizada kona-ba koordenasaun ba sokorista emerjénsia sira. Graduadu Treinadór Prinsipál sira mai husi instituisaun Timoroan oioin inklui Autoridade Protesaun Sivíl, Polísia Nasionál, Departamentu Ambientál, Bombeiru, Departamentu Ambulánsia, no Organizasaun Internasionál ba Migrasaun nia Sentru Emerjénsia Dezastre.

Sita husi komunikadu imprensa ne’ebé Hatutan.com asesu, Sesta (14/06/2024),  katak dezde tinan 2014, Estadus Unidus fornese ona $675,000 ba formasaun kona-ba responde emerjénsia iha Timor-Leste liuhusi Gabinete Asisténsia Umanitária. Ami-nia parseria ho Estadus Unidus Amérika nia Servisu Florestál ho objetivu integra komponente relevante sira iha Estadus Unidus nia Sistema Jestaun Insidente Nasionál ba iha sistema jestaun dezastre husi nasaun parseiru sira.

Liuhusi programa rejionál ida-ne’e, Estadus Unidus nia Servisu Florestál apoia Governu Timor-Leste hodi dezenvolve no promove Sistema Komandu Insidente ninia kapasidade no hadi’ak membru ekipa lokál ninia abilidade hodi responde ba dezastre naturál sira Liuhusi formasaun, ezersísiu, mentoria no simulasaun ne’ebé detalladu.

“Ha’u espera ho ezisténsia ita-nia graduadu Treinadór Prinsipál Sistema Komandu Insidente iha Timor-Leste, ita bele hasa’e tan koñesimentu kona-ba Sistema Komandu Insidente ba instituisaun relevante sira hotu, tulun fornese asaun resposta prioridade sira  durante kualkér krize iha futuru,” Embaixada Amérika iha Dili nia Adjuntu Xefe Misaun Interinu Eric Sheffield hateten.

Eventu graduasaun ba Treinadór Prinsipál ba Sistema Komandu Insidente ne’e hetan partisipasaun husi Embaixada EUA iha Dili ninia reprezentante Adjuntu Xefe Misaun Interinu Eric Sheffield, Sekretáriu Estadu ba Protesaun Sivíl Domingos Mariano Reis, Prezidente Autoridade Protesaun Sivíl Ismael da Costa Babo, Jerente Programa Estadus Unidus nia Servisu Florestál Martha Williamson, Xefe Misaun IOM Interina Kristina Carreon, no reprezentante sira husi instituisaun sokorista dahuluk iha Timor-Leste hanesan Polísia Nasionál, bombeiru, Departamentu Ambulánsia, no instituisaun relevante sira seluk.

 Kona-ba USAID

Liuhusi USAID, Embaixada Estadus Unidus iha Timor-Leste kontribui ona besik millaun $92 entre tinan 2021 to’o 2025, hametin Timor-Leste ninia ekonomia no promove boa-governasaun. Dezde Timor-Leste ninia independénsia, USAID kontribui ona millaun $323 resin, haburas inkluzivu no dezenvolvimentu p’az ba nasaun ida ne’ebé prósperu, saudavel no autosufisiente liu.

Jornalista: Leopoldina de Carvalho