Hatutan.com, (05 Jullu 2024), Díli- Parlamentu Nasionál (PN) liuhusi Bankada FRETILIN konsidera atendimentu emisaun pasaporte  laiha kualidade maske  uza ona sistema online.

Lee Mós: Governu Sosa Ona Mákina Impresora Pasaporte Unidade Rua ho Kustu $330,000

Abitante sira tuur hein hela iha fati trata pasaporte nian Servisu Rezistu Notariadu atu trata sira-nia pasaporte. Foto/Dok.Tome da Silva

Membru Bankada FRETILIN, Nurima Ribeiro Alkatiri, Sesta (05/07/2024), aprezenta justifikasaun katak Governu aprezenta ona atendimentu emisaun pasaporte nian liuhusi online, maibé informasuna ne’ebé Deputada ne’e iha katak sistema ne’e la funsiona hodi kria nafatin dezentendimentu no burokrasia naruk iha prosesu emisaun pasaporte ne’e rasik iha Diresaun Nasionál Servisu Rejistu Notariadu, Ministériu Justisa.

Iha sorin seluk, membru PN husi Bankada CNRT, Natalino dos Santos, bolu atensaun ba Ministru Justisa, Sérgio Hornai atu tau atensaun ba iha Diresaun Nasionál Servisu Rejistu Notariadu para  bele responde lalais preokupasaun sidadaun sira ne’ebe hakarak hetan pasaporte.

“Iha sistema online ne’e, iha sistema balun di’ak, maibé tanba de’it dividu husi mákina produsaun balun avaria tiha, entaun afeta mós ba prosesu emisaun. Nune’e, husu Ministru Justisa, Sérgio Hornai, oinsá atu haree hodi nune’e bele halo akizisaun ba mákina produsaun pasaporte no prosesu emisaun pasaporte ne’e labele konsentra de’it iha Díli no tenke halo mós iha munisípiu sira inklui RAEOA,” Deputadu Natalino dos Santos hateten,

Ministru Justisa, Sérgio Hornai ne’ebé jornalista sira konfirma kona-bá preokupasaun ne’e, klarifika katak esforsu ba pasaporte halo dau-daun, mezmu mákina produsaun pasaporte nian rua ne’ebé instala iha 2017 avaria hela, maibé sei utiliza hela mákina rua seluk hodi halo atendimentu públiku.

 Ministériu Justisa iha ona desizaun  hodi halo akizisaun ba mákina produsaun pasaporte nian rua tna  para atu substitui ba mákina rua ne’ebe avaria.

“Ita hein de’it iha tempu sira besik mai hodi halo instalasaun ba mákina impresora pasaporte nian ne’ebé Governu halo ona akizisaun hodi bele providénsia ka hatán ba públiku  sira-nia preokupasaun,” Ministru Sérgio Hornai hateten.

Jornalista Estajiária: Isabel Pirres/Dircia Ximenes  Guterres