Hatutan.com, (16 Dezembru 2024), Díli- Prezidente Repúblika (PR), José Ramos-Horta hala’o vizita Estadu dahuluk ba Bangladesh hodi partisipa iha selebrasaun loron Vitória Bangladesh nian ne’ebé selebra  iha loron 16 fulan-Dezembru 2024.

Lee Mós: TL-Vietnam Asina Akordu Izensaun Vistu Bá Pasaporte Servisu ho Diplomátiku

PR Ramos-Hosta halo sorumutuk ho Xefe Konselleiru ba Governu Bangladeza, Muhamad Yunus, Segunda (16/12/2024). Foto/Espesiál

Vizita Estadu ne’e, Xefe Estadu sei sai mós testemuña ba asinatura akordu husi Ministru Negósiu Estranjeiru no Kooperasaun, Bendito Freitas ho Ministru Negósiu Estranjeiru Bangladesh nian kona-ba izensaun vístu bá titulár pasaporte servisu no diplomátiku entre nasaun rua, Alende ne’e selebra mós Memorandu Entendimentu sobre ‘Regular Foreign Office Consultation’ entre Timor-Leste ho Bangladesh.

Vizita Estadu Ramos-Horta nian ne’e hetan autorizasaun hosi Parlamentu Nasionál Timor-Leste no vizita ofisiál ne’e hahú iha loron 14 to’o loron 17 fulan-Dezembru 2024.

Vizita estadu ne’e mós hetan konvite husi Muhamad Yunus hanesan mós laureadu Nobel ba Pás iha tinan 2006 atuál Xefe Konselleiru ba Governu Bangladeza (Primeiru Ministru Interinu).

Komunikadu ba imprensa ne’ebé Hatutan.com asesu, Segunda (16/12/2024), hateten iha vizita Estadu ne’e parte rua sei destaka importánsia hosi relasaun entre nasaun rua ne’e no rekoñesimentu ba knaar Prezidente Repúblika José Ramos-Horta nian nu’udar líder mundiál iha konstrusaun dame no demokrasia.

Xefe Estadu ho delegasaun to’o iha Aeroportu Internasionál Hazrat Shahjalal-Dhaka iha tuku 22:40 oras Banglades nian, simu hosi Honorável Konselleiru Xefe Governu, Muhammad Yunus no entrega ai-funan hodi fó benvindu no mós akompaña ho parada militár.

Tuir ajenda, iha loron 15 fulan-Dezembru, Xefe Estadu hahú ona nia vizita ofisiál ho enkontru tete-a-tete (one-to-one) ho Primeiru-Ministru Interinu Bangladesh, Muhammad Yunus, iha nia servisu fatin Shimul no tuir kedas ho diskusaun bilaterál entre delegasaun nasaun rua nian.

Agenda tuir mai Prezidente Repúblika ho delegasaun mós sei partisipa iha serimónia resesaun bá selebrasaun tinan 54 Loron Vitória Bangladexe nian. Vizita mós Savar Memoriál Mártires Nasionál Bangladesh no ajenda importante seluk tan.

Iha kalan, Prezidente Ramos-Horta  partisipa iha bankete estadu nian ne’ebé ofrese hosi Honorável Konselleiru Xefe Governu iha Salaun, Pan Pasífiku Sonargaon Dhaka.

Iha loron 16 Dezembru, Prezidente Ramos-Horta sei vizita Memoriál Nasionál Martir nian iha Savar hodi fó respeitu ba martir sira husi Funu Libertasaun Bangladesh nian.

Prezidente Ramos-Horta sei hala’o sorumutuk ho Honorável Prezidente Bangladexe nian, Sua Exelénsia Mohammed Shahabuddin, iha Bangabhaban. Líder rua ne’e sei partisipa iha serimónia resepsaun hodi selebra Loron Vitória Bangladesh nian ba dala 54. Serimónia ne’e sei inklui toka inu nasionál nasaun rua nian, hahú ho Bangladesh nian tuir kedas ho Timor-Leste nian.

Iha loron 17 Dezembru, Prezidente Ramos-Horta sei hato’o palestra públika iha Institutu Estudu Internasionál no Estratéjiku Bangladeshnian (BIISS) kona-ba “Dezafiu ba Pás iha Mundu Kontemporáneu.” Prezidente mós sei hala’o sorumutuk iha salaun munisípiu ho estudante no líder juventude sira, hodi fahe ninia esperiénsia sira kona-ba Timor-Leste nia luta ba independénsia, viajen lideransa nian, no aspirasaun nasaun nian hafoin independénsia.

Vizita Estadu dahuluk hosi Prezidente Ramos-Horta ba Bangladesh subliña parseria ne’ebé buras daudaun entre Timor-Leste no Bangladesh, partikularmente bainhira Timor-Leste hakbesik ba adezaun tomak ba ASEAN iha tinan 2025-26, hodi loke posibilidade foun ba kooperasaun no diálogu rejionál.

Jornalista: Vito Salvadór