Hatutan.com, (13 Janeiru 2025), Díli- Anin-boot ne’ebé akontese iha semana ne’e nia laran rezulta uma 13 hetan estragu.

Lee Mós: Vítima Inséndiu iha Aldeia Buki Simu Materiál Konstrusaun hosi APC Selu Rasik Transporte Lori Bá Uma

Ahi han abitante ida nia uma. Foto/dok.APC

Dadus hosi Autoridade Protesaun Sivíl (APC, sigla portugés) hatudu katak hahú iha loron 06  to’o loron 13 fulan-Janeiru 2025, Timor-Leste enfrenta tipu dezastre bee tama uma  haat (4), ahi han uma  ida (1), anin-boot sobu  uma (13), rai-halai estraga uma ida  (1) no ai-monu hanehan uma rua (2).

Autoridade Protesaun Sivíl liu hosi Sentru Nasional Operasaun Protesaun Sivíl (CNOPC, sigla portugés) relata relatóriu kona-ba dezastre natural iha territóriu nia laran durante semana ida ne’ebe hatudu uma-kain 22 afetadu.

Iha Munisípiu Baucau, Postu Administrativu Vemasse, Suku Vemasse, Aldeia Betulale, iha loron 01 fulan-Janeiru 2025 akontese bee-sa’e komunidade nia uma tolu (3)

Iha loron 01 fulan-Janeiru 2025, iha Suku Uaigae, Aldeia Lari, akontese bee-sa’e komunidade nia uma ida (1).

Munisípiu Bobonaro, Postu Administrativu Maliana Villa, Suku Tapo Memo, Aldeia Lepguen, iha loron 08 fulan-Janeiru 2025 akontese rai lakan kona vítima ida (1) mate.

Munisípiu Ermera, Postu Administrativu Ermera, Suku Riheu, Aldeia Sosoher, iha loron 5 fulan-Janeiru 2025 akontese anin-boot halo ai monu hanehan komunidade nia uma ida (1).

Iha Suku Lisafat, Aldeia Tatae Ulo, Munisípiu Liquiça, iha loron 02 fulan-Janeiru 2025 akontese Anin sobu komunidade nia uma ida (1).

Iha Suku Poetete, Aldeia Samatrae, iha loron 05 fulan-Janeiru 2025 akontese anin sobu komunidade nia uma ida (1).

Munisípiu Lautem, Postu Administrativu Lautem Vila, Suku Com, Aldeia Pitileti, iha loron 05 fulan-Janeiru 2025 akontese ahi-han komunidade nia uma  ida (1).

Iha Suku Maina II, Aldeia Oirata, iha loron 05 fulan-Janeiru 2025 akontese anin sobu komunidade nia uma (1).

Iha Postu Administrativu Luro, Suku Lakawa, Aldeia Oneraba, iha loron 6 Janeiru 2025 Akontese Anin sobu komunidade nia uma (1).

Iha Postu Administrativu Bazartete, Suku Metagou, Aldeia Asurlema, iha loron 11 fulan-Janeiru 2025 akontese anin boot halo ai hanehan komunidade nia uma (1).

Munisípiu Manufahi, Postu Administrativu Same, Suku Letefoho, Aldeia Rialau, iha loron 05 Janeiru 2025 akontese anin-boot sobu komunidade nia uma ida (1).

Suku Babulo, Aldeia Lapuro, iha loron 10 fulan-Janeiru 2025 akontese anin-boot sobu komunidade nia uma ida (1).

Munisípiu Viqueque, Postu Administrativu Viqueque, Suku Luca, Aldeia Canlor, iha loron 11 fulan-Janeiru 2025 akontese ai hanehan komunidade nia uma  ida (1).

Komando APC Munisipiu sira ho parseiru relevante fornese ona asisténsia emerjénsia ba família afetadu sira hanesan ai-han no la’ós ai-han (food item & Non-food Item). Tanba ne’e Komandu Operasionál Autoridade Protesaun Sivíl (APC) munisípiu sira sei kontinua halo levantamentu detallu kona-ba sasán ne’ebe estragu no lakon.

“Autoridade Protesaun Sivíl hakarak rekomenda ba komunidade hotu karik akontese udan-boot husu komunidade atu bele hasees an hosi fatin risku sira hanesan mota ninin, foho lolon, ai-hun boot, liña eletrisidade no rai dokumentu importante iha fatin ne’ebe seguru,” portavós APC, Nelson Nunes de Orleans hateten iha nia servisu fatin iha Díli, Segunda (13/01/2025).

Iha Kazu emerjénsia ruma halo tuir orientasaun autoridade lokál  ka autoridade protesaun sivíl ne’ebé besik.  Karik presiza halo evakuasaun, mantein kalma nafatin no buka fatin ne’ebé seguru atu evita pániku.

Jornalista Estajiáriu : Lazaro Pereira Quefi