Hatutan.com, (02 Jullu 2025), Díli—Kompañia internasionál PT Aulia Multi Sarana ne’ebé kaer obra konstrusaun edifísiu sentrál Rádiu Televizaun Timor-Leste, Empreza Publika (RTTL,E.P)  fó garantia iha reuniaun Konsellu Administrasaun (board meeting) katak sira termina projetu ne’e tuir tempu ne’ebé konsta iha kontratu laran.

Lee Mós: Projetu Demolisaun Bá Edifísiu Sentral RTTL,E.P ho Montante US$179,066.90 Hamosu Duvida

Jornalista Hatutan.com entrevista Prezidente Konsellu Administrasaun RTTL,E.P, Elizeu Isaac Fernandes, Kuarta (02/07/2025).

Projetu edifísiu sentrál foun RTTL,E.P ne’e previstu investimentu ida  ho montante US$5,970659,11, ne’ebé finansiamentu hetan hosi parseria ida entre Governu Timor-Leste, Governu Japaun no Programa Nasoins Unidas ba Dezenvolvimentu (UNDP, sigla inglés) hanesan implementadór.

Iha loron 19 fulan-Dezembru tinan 2024, hala’o serimónia hatuur fatuk dahuluk  ba projetu konstrusaun edifísiu foun Rádiu no Televizaun Timor-Leste (RTTL,E.P) nian husi Primeiru-Ministru, Kay Rala Xanana Gusmão,  no projetu ne’e tenke remata ka termina iha fulan-Marsu 2026

Prezidente Konsellu Administrasaun RTTL,E.P,  Eliziu Issac Fernades, Kuarta (02/07/2025), iha Otél Timor bá Hatutan.com hateten konstrusaun edifísiu RTTL,E.P la’o hela no daudaun sei iha hela faze teste rai iha laboratóriu.

“Prosesu ne’e   la’o hela,  iha de’it mudansa uitoan  iha nia fundasaun  tanba  ita-nia rai ne’e   iha Caicoli komu bee demais, entaun fundasaun  inísiu ida-ne’ebé maka  loloos tuir BoQ  ne’e muda tanba rai ne’ebé iha ne’ebá ne’e labele  atu kria fundasaun ida-ne’e, tanba ne’e  maka kompañia tenke lori fila fali rai  ne’e  iha relatóriu hodi hein rezultadu laboratóriu ne’ebé la’o to’o semana rua,”  Eliziu Issac Fernandes hateten.

Nia dehan  prosesu bá konstrusaun ne’e hein hela rezultadu hosi teste laboratóriu, bainhira rezultadu sai ona, kompañia PT Aulia Multi Serana komesa fali servisu ba harii   fundasaun nian.

Nia hatutan, komunikasaun  entre RTTL, Obras Públiku  konsultóriu, kompañia  PT Aulia Multi Sarana ho UNDP kuaze  kada semana halo reuniaun Konsellu Administrasaun (board meeting)  hodi  ko’alia kona-bá progresu no dezafiu konstrusaun.

“Informasaun ruma karik hosi li’ur, ko’alia kona-bá  projetu ne’e katak paradu ne’e  laloos, projetu ne’e la’o hela  maka hanesan ita hotu hatene katak téknikamente projetu ne’e la’o tuir maneira tékniku nian,”  nia esplika.

“Dala ida tan ha’u dehan katak projetu ne’e la’o hela, entidade hotu, Governu liu-hosi Ministériu Obras Públiku mós partisipa, Konsultóriu  ne’ebé maka servisu hamutuk ho UNDP no mós kompañia mós sempre  tuir enkontru Konsellu Administrasaun (board meeting) kada semana,” nia  afirma tan.

Kona-bá  kompañia PT Aulia Multi Sarana, aluga   ekipamentu hosi kompañia TINOLINA nia, tuir Eliziu Issac Fernandes  konsidera  meius ne’e  di’ak tanba utiliza  emprezáriu Timor-oan nia ekipamentu pezadu sira hodi ajuda mós emprezáriu Timor-oan.

Bazeia bá reuniaun   ne’ebé  Konsellu Administrasaun sira halo kada semana, katak kompañia  PT Multi Aulia Sarana, kompromete atu konstrusaun edifísiu sentrál RTTL,E.P  ne’e termina iha data ne’ebé konsta ona iha kontratu laran.

Jornalista: Marcelino Tomae