Hatutan.com, (16 Setembru 2025), Díli– Parlamentu Nasionál (PN), liuhosi plenária, Tersa ne’e, aprova votu  votu á-favor 57, kontra zero no no abstensaun zero (unanimidade) kona-bá rezolusaun Parlamentu Nasionál númeru 65/2025 hodi kansela sosa karreta foun bá deputadu na’in-65.

Lee Mós: Manifestasaun EUTL Obriga Bankada CNRT, PD ho KHUNTO Deside Kansela Sosa Karreta Foun

Intervensaun manifestante sira nian obriga membru PN kansela sosa karreta ba Deputadu nain-65. Foto/Marcelino Tamae

Bankada CNRT liuhusi vise-Prezidente bankada nian, Patrocínio dos Reis Fernandes hateten iha nia intervensaun katak CNRT kontínua ho pozisaun polítika ne’ebé fó sai ona  bá públiku iha Segunda (15/09/2025), nune’e loron tuir mai (Tersa ne’e) CNRT hakarak konsistente hodi formaliza pozisaun liuhosi aprezenta rezolusaun ba plenária PN hodi kansela sosa karreta ba Deputadu na’in-65.

“Ami deputadu Bankada CNRT aprezenta bá meza PN atu delibera tanba plenária nia desizaun maka vinkula bá prosedimentu sira ne’e hotu,” Patrocínio dos Reis Fernandes hatetne iha nia intervensaun iha plenária iha ámbitu aprezenta rezolusaun ba konselamentu sosa karreta ba Deputadu sira.

Biban ne’e membru PN hosi Bankada  FRETILIN, Antoninho Bianco hateten ho aspirasaun sira ne’ebé hamosu situasaun iha Segunda to’o mai Tersa ne’e, hatudu katak la presiza dada kleur no tenke foti medida emerjénsia no rezolve emerjénsia, tanba ne’e maka ajenda laiha maibé Bankada FRETILIN mós pronúnsia ona atu aprezenta projetu rezolusaun ida ne’e.

“Tempu ona, ita iha konsensu ida para atu bele hasai rezolusaun tanba situasaun ne’e ita tenke konsensu duni, fiar aan deit labele, tenke fiar malu, hamutuk halo mudansa,” Deputadu Antoninho Bianco hateten iha plenária.

Prezidente Bankada PLP, Deputada Maria Angelina Lopes Sarmento hateten buat seluk ne’ebé presiza hanoin mós maka, altera lei pensaun vitálisia ho lei manifestasaun.

Molok ne’e, Ministériu Planeamentu no Investimentu Estratéjiku (MPIE), Gastão de Sousa ba jornalista sira esplika Komisaun Nasionál Aprovizionamentu (CAN, sigla portugés) seidauk iha kontratu ho empreza ruma hodi sosa karreta ba deputadu nain-65. Tanba ne’e informasuan sira hateten katak karreta bá Deputadu sira iha ona dalan ne’e laloos ida.

Nia esplika prosesu sosa karreta ne’e  agora dadaun sei iha faze Pos-kualifikasaun, signifika manán na’in iha lista númeru ida too haat ne’e iha ona, sei bá haree sira iha kapasidade atu sosa karreta ka lae, tanba iha ne’ebá sei iha buat barak, ne’ebé presiza haree, sira iha ofisina ka lae no saida-saida ne’ebé presiza tetu hotu, molok hakat bá faze sira tuir mai.

“Prosesu agora iha pos-kualifikasaun hela, ha’u sei hein relatóriu finál, karreta seidauk sosa, seidauk iha kontratu ida asina, manán na’in mós seidauk hatene sé,” Ministru Gastão de Gastão inform aba jornalista sira iha nia servisu fatin.

Husi sorin seluk, Sekretáriu Jerál Parlamentu Nasionál, Edgar Sequeira Martins, informa iha Segunda (15/09/2025), Bankada tolu, kompostu hosi CNRT, PD ho KHUNTO fó sai  ona ba públiku  kona-bá kansela prosesu akizasaun karreta foun ba Parlamentu Nasionál.

Nia informa katak akizasaun sosa karreta seidauk finál tanba iha hela prosesu Aprovizionamentu, signifika karreta seidauk sosa, karreta mós seidauk mai no kompañia mós seidauk iha kontratu.

“Ami iha Konsellu Administrasaun  iha reprezentante Bankada sira hotu sei formaliza deklarasaun ne’ebé maka Bankada sira hato’o hodi kansela sosa karreta,” Edgar Sequeira Martins infroma.

Iha Orsamentu Jerál Estadu  tinan 2025, aloka orsamentu ho montante millaun $4,2 hodi sosa karreta foun 65 ba Deputadu sira  hodi fasilita mobilidade no servisu deputadu sira nian nu’udár órgaun lejislativu.

Jornalista: Zita Menezes