Hatutan.com, (23 Fevereiru 2026), Díli-Vitíma ho naran inisiál ZFS, Segunda (23/02/2026), hale’u tuku 18:55 OTL, submete keixa kontra ofisiál Polísia Militár F-FDTL na’in-rua ho inisiál WLC ho A ne’ebé baku lesuk nia, foin lalais ne’e.

Vitíma ho naran inisiál ZFS hato’o keixa ba Diresaun Servisu Investigasaun Kriminál Nasionál (DSIKN) PNTL, Segunda (23/02/2026). Foto/Juvinal Cabral dos Santos

Informasaun ne’ebé vitíma haktuir ba iha autoridade Polísia liuhusi Diresaun Servisu Investigasaun Kriminál Nasionál (DSIKN) katak krime ofensa integridade fizika grave ne’e akontese iha loron 05 fulan-Fevereiru 2026, tuku 12:00 Otl, iha Fatuhada, Díli.

Relasiona ho kazu krime ofensa ba integridade fízika grave ne’e, Polísia Nasionál Timor-Leste (PNTL) liuhusi Diresaun Servisu Investigasaun Kriminál Nasionál (DSIKN) rejistu ona ho NUK:0064/26-PNSIC.

Tuir Leí krime ofensa ba integridade fízika grave maka kazu krime ida ne’ebé fó perigu boot ba vítima, hanesan baku to’o ran suli, ain tohar, ka uza arma branka. Krime ne’e, regula husi Kodigu Penál Timór-Leste artigu 141 – Ofensa ba integridade fízika simples, no artigu 142/143 ba kazu grave.

Jornalista: Juvinal Cabral dos Santos