Hatutan.com, (07 Outubru 2021), Díli-Dezafiu boot ba Unidade Patrullamentu Fronteira (UPF) durante ne’e maka menus rekursu umanus no fasilidade ne’ebé minima tebes. Ho nune’e, sai mós sasidik boot ba mellora patrullamentu iha liña fronteira terrestre hodi kombate atividade ilegál.  

 UPF dezempeña knaar importante ida iha kontrolu iha área fronteira, loron no kalan, ba ema no sasán sira ne’ebé tama tuir dalan ilegál iha Timor-Leste.

Notísia iha Relasaun : Deskobre fukun-sira fó espasu ba pasajen ilegál buras iha fronteira

Advertisement

Iha proposta orsamentu tinan fiskál 2021 nian, ministériu interiór propoin ba Governu atu konstrui postu permanente hamutuk hitu iha liña fronteira, maibé razaun COVID-19 halo konstrusaun ne’e atraza no oras ne’e iha hela faze konstrusaun.

Komandu Jerál PNTL hamutuk ho parseiru dezenvolvimentu konstrui postu temporáriu hamutuk 24 ne’ebé oras ne’e UPF utiliza hodi hala’o serbisu atu bele kombate  pasajen no tranzasaun ilegál sira.

“Loloos iha tinan ne’e, Governu konstrui tan postu permanente hamutuk hitu (7) maibé tanba COVID-19 ita la konsege no ita nia parseiru dezenvolvimentu sira ajuda ita konstrui postu temporáriu ne’ebé ho kondisaun natoon atu ita-nia UPF sira uza hodi halo serbisu iha fronteira,” Komandante Jerál PNTL,  Komisáriu Faustino da Costa, hateten ba jornalista hafoin hasoru malu ho Prezidente Repúblika, Francisco Guterres “Lú Olo” iha Palásiu Prezidensiál, Díli, Kinta (07/10/2021).

Komisáriu Polísia Faustino da Costa, afirma problema ne’ebé unidade UPF enfrenta iha fronteira ida boot liu mak ita nia rekursu umanus, nune’e dalaruma iha postu balun destaka de’it membru na’in-rua no dalaruma labele kobre área hotu iha fronteira.

“Ami mós propoin atu iha rekrutamentu ba membru foun iha tinan sira tuir mai,” Komisáriu Faustino da Costa hateten.

Advertisement

kona-ba viatura, Faustino da Costa, informa 2021 sosa karreta operasionál hamutuk 21 maibé karreta sira ne’e  la fó de’it ba UPF, maibé atribui mós ba iha komandu munisípiu sira tamba sira enfrenta problema iha viatura operasionál.

Liuhosi sorumutuk ne’e, Komisáriu Faustino da Costa, relata ba Prezidente Repúblika, Francisco Guterres “Lú Olo” kona-bá situasaun jerál iha territóriu nasionál no situasaun atuál iha liña fronteira sira, inklui preparasaun PNTL nian ba seguransa iha situasaun eleisaun prezidensiál 2022. (bit)

Advertisement