Hatutan.com, ( 30 Abríl 2023), Díli—Ema deskoñesidu taa joven ida (seidauk hetene indentidade loloos) iha Suku Cová, Postu Administrativu Balibo, Munisípiu Bobonaro, Domingu (30/4/2023).
Vitíma ne’ebé ema deskoñesidu taa iha área Suku Cová, Postu Administrativu Balibo, Munisípiu Bobonaro, hala’o hela tratamentu intensivu iha Sentru Saúde Balibo, Domingu (30/4/2023). Foto/Hatutan.com
Kronolojia ne’ebé Hatutan.com halibur hosi komunidade sira Cová, Postu Administrativu Balibo, haktuir, akontesimentu ne’e derrepente de’it, sira haree joven oan ne’ebé nia orijen hosi Aldeia Lotan, Suku Batugade, Postu Administrativu Balibo, mosu mai iha área Cová nian ho ran suli maka’as tanba hetan taa.
Informasaun ne’ebé sirkula iha Suku Cová laran to’o mai Balibo katak, joven ne’e halai mesak mai to’o Cová ho ran sulin maka’as iha isin-lolon no liman. Tuir informasaun katak, nia ho nia maluk joven na’in-rua (2) tan mak bá hala’o tranzasaun sosa motór hosi ema balun iha parte Indonézia nian. Parte sira promete malu atu hasoru malu iha parte tali-laran, Suku Cová nian atu bele entrega osan no simu motór.
Tuir kronolojia ne’ebé vítima haktuir bá komunidade sira bainhira hetan nia ho ran sulin maka’as, katak nia ho nia joven maluk na’in-rua tan mak la’o hamutuk lori ho osan atu bá sosa motór ne’ebé sira promete bá malu tiha ona hodi hasoru malu iha fatin akontesimentu.
Bainhira vítima hasai osan entrega bá parte sira ne’ebé fa’an motór, derrepente de’it ema sira fa’an motór hasai sasán kro’at atu hanesan samurai taa kedas bá vítima nia liman hodi rezulta liman parte loos atu kotu (kulit de’it mak sei kaer, maibé liman ruin kotu kedas) no liman fuan-ida hosi parte karuk nian kotu kedas.
Haree ema sira fa’an motór ne’e lori sasán kro’at no taa ona vítima, maka vítima nia kolega na’in-rua ne’ebé akompaña atu bá foti motór ho ta’uk halai soe hela vítima hodi salva sira-nia aan.
Hafoin taa tiha vítima, ema deskoñesidu sira ne’e lori fila motór bá área Indonézia nian, hadau vítima nia osan no lori halai mós vítima nia telemovel (handphone). Vítima dezenraska rasik no esforsu aan mesak la’o to’o iha Cová no husu ajuda bá komunidade sira.
To’o agora vítima sei iha hela tratamentu intensivu iha Sentru Saúde Balibo hodi suku nia kanek sira liman loloon sira.
To’o notísia ne’e hatún seidauk hetan konfirmasaun hosi autoridade ka Polisia Nasionál Timor-Leste Eskuadra Postu Administrativu Balibo, Munisípiu Bobonaro.
Jornalista Estajiáriu : Lazaro Pereira Quefi