Hatutan.com, (30 Maiu 2023), Díli-Prezidente Repúblika (PR), José Ramos-Horta,  Tersa (30/5/2023), husik hela ona Timor-Leste hodi halo vizita Estadu bá Koreia Súl hodi partisipa iha Forum Jeju no sai orador prinsipál iha forum ne’e ho tema “Pás no Prosperidade”.

Lee Mós : Prezidente Repúblika Sei Husu Auditoria ba Servisu Órgaun Eleitorál

Prezidente Repúblika, José Ramos-Horta, hlao vizita Estadu bá Koreia Súl. Foto/Elio dos Santos da Costa

Komunikadu imprensa ne’ebé Hatuta.com asesu hosi gabinete mídia Palásiu Prezidensiál, relata katak  Prezidente Repúblika José Ramos-Horta durante loron-tolu (3) hahú hosi loron 30 fulan-Maiu to’o loron 3 fulan Juñu 2023,  estadia iha Koreia Súl, hodi  hala’o sorumutuk mós ho nia omólogu Prezidente Koreia, Yoon Suk Yeol.

Prezidente Ramos-Horta mós sei hola parte iha jantár ofisial ne`ebé   oferese husi Governadór Provínsia Jeju nian.

Iha vizita Estadu ne’e, Prezidente Repúblika, José Ramos-Horta, sei vizita Kuartel Jerál SK E&S no SK Forest, kompañia rua ne’ebé investe iha Timor Leste.

Tuir agenda, Prezidente Repúblika mós sei hala’o enkontru ho Instituisaun Públiku no Privadu hodi husu tulun hodi harii  eskola téknika vokasional ba joven timoroan sira.

Vizita Prezidente Repúblika ne’e  akompaña hosi delegasaun ida hosi ANPM (Ajénsia National Petróleu no Mineral) atu esplora tan esperiénsia no oportunidade kona-bá investimentu iha projetu armajenamentu no kaptura karbonu iha instalasaun husi kampu petrolíferu iha Bayu Undang.

Vizita kortezia ida-ne’e ho objetivu atu hametin lasu amizade entre  Timor-Leste ho Koreia Súl, nune’e mós atu identifika setor produtivu balun ne’ebé ligadu ho kooperasaun ekonómika iha futuru.

Hafoin remata vizita iha Koreia Súl, iha loron 4 fulan-Juñu, Prezidente Repúblika kontinua vizita bá Singapura hodi partisipa iha simeira Asian nian bá da-XX kona-bá Seguransa.

Prezidente Repúblika, José Ramos-Horta. Foto/Mídia GPR

Presidente Repúblika nu’udár úniku Xefe Estadu estranjeiru ne’ebé hato’o diskursu iha sesaun plenária da-nen ba Diálogu Sangri-La kona-bá Parseria bá Seguransa iha Asia Pasífiku.

Durante estadia iha iha Singapura, Prezidente Repúblika hala’o enkontru ho Ministru Defeza Singapura nian,  Ng Eng Hen, no sei partisipa mós iha Jantár Ofisial ne’ebé  oferese hosi Prezidente Repúblika Singapura,  Halimah Jacoob.

Hahú husi fulan-Maiu 2022,  Prezidente Repúblika hala’o ona vizita Estadu bá Estadu Indonézia, Austrália, Portugal, Reinu Kamboja, Singapura, no mós vizita servisu ba Brazil, Qatar no Azerbaijan.

Jornalista: Vito Salvadór