Hatutan.com, (31 Maiu 2023), Díli-Governu liuhosi Ministériu Interior ho komandu Polísia Nasionál Timor-Leste (PNTL) sei dignifika membru na’in-158 ne’ebé naran tama ona iha lista reforma nian molok sira fila bá vida sivíl.

Lee Mós : Vise-Ministru Interiór Konfirma Prosesu Reforma Membru PNTL Na’in-158 Tuir Regra

Lista naran membru sira ne’e, parte komandu PNTL lori bá halo anunsia ona iha Jornál Repúblika ne’ebé publika ona iha edisaun Sesta 05 fulan-Maiu 2023.

Komandante Pesoál no Formasaun, Superintendente Xefe Polísia Arquimínio Ramos. Foto/Elio dos Santos da Costa

Vise-Ministru Interior (MI), António Armindo, hateten molok membru sira ne’e fila bá vida sivíl, tenke iha duni serimónia espesiál bá sir  hodi fó kondekorasaun ruma, tanba durante tinan barak nia laran, membru sira ne’e, kontribui ona buat di’ak barak bá instituisaun PNTL.

“Kona-bá kondekorasaun, serimónia bá sira molok sira atu remata, ne’e naturalmente, komandu tenke halo, no hetan  apoiu másimu hosi governu,” Vise-Ministru Interior (MI), António Armindo hateten bá jornalista sira, hafoin partisipa iha sorumutuk Konsellu Ministru sira-nian iha Palásiu Governu, Díli, Kuarta (31/05/2023).

António Armindo dehan, atu kondekora ida ho oinsá ne’e, nia parte seidauk hatene, tanba ida ne’e organiza hosi komandu, la’ós ministériu. Komandu PNTL maka sei apresia ninia funsionáriu sira ne’ebé mak servisu ho sira.

Komandu PNTL liuhosi komandante Pesoál no Formasaun, Superintendente Xefe Polísia Arquimínio Ramos hatutan, maske lista naran membru reformadu sira ne’e anúnsiu ona iha jornál repúblika, maibé, komandu sei hein hosi parte Instituto Nacional de Segurança Sosial (INSS), sira halo hela kontajen.

Bainhira prosesu sira iha INSS mak konklui ona, sira sei haruka karta notifikasaun bá Komandu PNTL, liuhosi Departamentu Pesoál no Formasaun, no hafoin simu tiha notifikasaun ida ne’e maka sei bele organiza serimónia ikus nian bá membru reformadu sira ne’e.

“Agora daudauk, ita hanoin hela, prepara sertifikadu rekoñesimentu bá sira, tanba ita-nia kolega sira ne’e servisu hamutuk kleur, ita hahú PNTL ne’e hosi zero, ita dezenvolve to’o  agora ne’e. Ami mak hahú, hahú hosi buat ida mamuk, servisu ho UN (United Nations) sira, to’o ohin,” Arquimíno  Ramos subliña.

Komandu PNTL kompromete atu trata membru sira ne’e ho dignu, tanba sira servisu hamutuk kleur, no molok sira atu husik instituisaun ne’e mós, tenke duni trata sira ho dignu.

Iha fatin seluk,  ida pensaun bá reforma ne’e, ema ida-idak bá trata iha INSS, maibé, PNTL lae, tanba parte komandu koordena tiha ona INSS atu ajuda membru sira ne’e halo tratamentu bá sira ninia dokumentu sira.

Lee Mós : Komisaun B PN Kestiona Prosesu Reforma Membru PNTL Na’in-158

Jornalista: Rogério Pereira Cárceres