Hatutan.com, (21 Setembru 2023), Díli-Prezidente Parlamentu Nasionál (PPN), Maria Fernanda Lay, hateten  bá oin PN sei  la envolve  mídia ka jornalista iha atividade fiskalizasaun bá munisípiu sira.

Lee Mós: Deputada Maria Fernanda Lay Eleita Nu’udár Prezidente PN Períudu 2023-2028

PPN Mari Fernanda Lay hosi Partidu CNRT ne’e argumenta katak bainhira lori tán mídia iha atividade sira fiskalizasaun bele prejudika mós bá orsamentu, katak sei aumentu gastu ne’ebé boot liután.

PPN Mari Fernanda Lay lidera serímonia posse bá membru foun CI, Isabel Fernandes bá restante mandatu 2021-2025. Foto/Elio dos Santos da Costa

“Ha’u hanoin primeiru kustu sira alojamentu nian mídia tuir loloos atu bá buka notisía, ita-boot sira iha meius rasik. Ha’u hanoin ko’alia ho Conselho Imprensa (CI), seraké, purke média ohin loron ne’e, ha’u bele lori telemovél ida ha’u bele On Air, ha’u bá São Tomé e Princípe ho Portugal, ha’u la lori media. Maibé, média G7+ nian, akompaña ho ha’u, ema ida de’it, nia bele halo live iha mundu seluk, di’ak liután,” Maria Fernanda Lay hateten bá jornalista sira iha PN, Kinta (21/09/2023).

Hafoin fó posse bá membru Conselho de Imprensa Timor-Leste, Isabel Fernandes bá restante mandatu 2021-2025, PPN Fernanda Lay hateten ohin loron lori mídia  tenki lori mós ho  videographer  no lori mós reporter ida halo  entrevista. Ne’e tuir PPN katak  presiza kustu, maibé ohin loron mundu dijitál ona, lori de’it telemovel mós bele ona utiliza hodi hala’o knaar divulga informasaun liuhosi meiu oioin iha plataforma dijitál.

“Ita-boot (jornalista) sira mós krítika ami. Sé la bá fiskaliza, halo nusá? Ne’e la’os bá hasai de’it, tenke  haree, osan tau bá, loos ka lae. Deputadu sira mak aprova orsamentu, nia mak tenke bá halo fiskalizasaun iha ne’ebá, la’os mídia de’it,” Fernanda Lay hateten.

Kona-bá povu presiza akompaña no asesa atividade sira PN nian iha mídia konvensionál sira, Fernanda Lay afirma, la presiza’ tanba Parlamentu iha ona rádiu rasik, iha televizaun mós iha, povu bele asesa informasaun liuhosi internet (youtube) ho telemóvel rasik.

Parlamentu Nasionál mak órgaun soberania RDTL nian ne’ebé  reprezenta povu Timor-Leste, iha kbiit atu halo lei, fiskaliza no atu halo desizaun polítika tuir Konstituisaun artigu 92.

Jornalista Estajiária: Zita Menezes