Hatutan.com, (14 Maiu 2024), Díli— Hahú hosi tinan 2000 to’o 2023, Governu liu hosi Sekretáriu Estadu Terras no propriedade (SETP) rekolla ona millaun $60 bá kofre Estadu hosi arrendamentu rai Estadu.

Rai Estadu balun iha área Bebonuk, Díli, ne’ebé Estadu estabelese kontratu arrendamentu ho empreza balun maibé to’o agora abandonadu. Foto/Hatutan.com

“Desde tempu UNTAET iha tinan 2000 to’o 2023, Governu rekolla ona reseita hosi arrendamentu rai Estadu hamutuk millaun $60 resin bá kaixa Jerál Estadu. Iha fulan tolu dahuluk ka trimestre dahuluk tinan 2024, Estadu liu hosi arrendamentu rai Estadu hatama reseita millaun $1 resin ho totál ema ne’ebé halo arrendamentu ne’e hamutuk 4.000-resin,” Sekretáriu Estadu Terras no propriedade (SETP), Jaime Xavier hateten iha Salaun Multiosos GMN, Bebora, tersa (14/05/2024).

Lee Mós: Ministériu Justisa Sei Kontrola Pratika “Mafia” Rai Estadu

Agora daudaun ekipa Terras no Propriedade halo hela esforsu atu tékniku sira bá halo fila-fali levantamentu dadus bá komunidade no ema sira ne’ebé okupa hela sasan Estadu nian atu regulariza hodi hatama reseita.

Nia afirma servisu ida-ne’e makas tebe-tebes maibé iha difikuldade ne’ebé enfrenta tanba menus funsionáriu, ho ida-ne’e sei buka akumula mós funsionáriu sira hosi munisípiu mai tán Dili hodi haree patrimóniu Estadu sira ne’ebé uluk sidadaun Indonézia sira husik hela seidauk regulariza no tenke regula.

Hosi dadus ne’ebé iha hatudu rai Estadu ka propriedade Estadu ne’ebé oras-ne’e daudaun fó arrendamentu hamutuk 3.000-resin no balun seidauk halo kontratu arrendamentu liu-liu bá uma sira ne’ebé uluk hanaran perumahan tanba ne’e ba oin Governu liu hosi Terras no Propriedade sei haree atu halo arrendamentu tuir Lei hodi hatama reseita ba Estadu.

“Governu haree hela atu halo kontratu ho okupante propriedade Estadu sira tuir Lei numeru 1/2003 no mos dekretu lei 19/2004,” nia subliña.

Governu sei notifika empreza Nasionál-Estranjeiru

Sekretáriu Estadu Terras no propriedade (SETP), Jaime Xavier. Foto: Elio dos Santos da Costa.

Sekretáriu Estadu Terras no propriedade (SETP), Jaime Xavier informa, Governu halo hela esforsu atu hare hikas emprezáriu nasionál no mos estrajeiru sira ne’ebé halo tiha arrendamentu ba rai Estadu maibé la halo investimentu.

“Agora daudaun Governu fó ona notifikasaun no orienta ona diretór sira hodi notifika timoroan no estranjeiru sira ne’ebé halo arrendamentu ho Estadu, sira la halo buat ida. Ne’e ami fó notifikasaun ona para sira bele halo buat ruma no la halo tuir lei, Governu sei foti fali,” Jaime Xavier hateten.

Bainhira Governu notifika emprezariu nasionál no estranjeiru sira ne’ebé halo arrendamentu ba rai Estadu no abandona de’it seim iha justifikasaun klaru, Governu sei foti hodi fó ba ema seluk atu nune’e bele kontribui bá dezenvolvimentu nasionál no kria empregu ba timoroan sira.

Jornalista: Vito Salvadór