Hatutan.com, (23 Maiu 2022), Díli—Parlamentu Nasionál (PN), liu hosi Sekretária Meza Lídia Norberta dos Santos informa katak, iha tempu badak sei konvoka plenária hodi hasai imunidade deputadu Partidu Congresso Nacional Reconstrução Timorense (CNRT), Arão Noé de Jesus Amaral hodi hatán kona-bá nia kazu iha Tribunál.

“Ita simu ofísiu ida hosi Prokuradoria Jerál da Republika, relasiona ho levantamentu imunidade hosi deputadu Arão Noé nian, atu bele halo inkéritu. Ida-ne’e mak ita atu ajenda mós antes to’o 15 Jullu,” Lídia Norberta dos Santos hateten iha PN, Segunda (24/05/2022).

Lee Mós: PN Hasai Imunidade Deputadu António “Kalohan”

Hatán kona-bá kazu saida mak deputadu Arão Noé komete, Lídia Norberta dehan ne’e segredu justisa no simplesmente PN koopera de’it ho justisa, liuhosi hasai imunidade kualkér deputadu ne’ebé mak iha nune’e, bele submete ba prosesu.

“Konteúdu kona-bá deputadu ida-idak nia kazu iha ne’ebá ami sei la fó sai iha ne’e. Tanba ne’e, la’ós kompeténsia PN no ne’e segredu justisa, ami labele ko’alia sai. Nia diferensa maka, baibain kuandu ita foti imunidade deputadu ida nian ba atu tuir ona julgamentu. Agora, deputadu Arão nian laiha, foin mak hahú inkéritu. Ne’e mak sira husu foti imunidade,” deputada Lídia Norberta, hateten.

Tuir kalendáriu, molok tama to’o loron 15 fulan-jullu tinan ne’e, liuhosi PN, deputadu sira sei halo aprovasaun ida hodi hasai imunidade deputadu Arão Noé de Jesus Amaral.

“Ida-ne’e mak ohin ha’u dehan sei ajenda antes 15 jullu. Ne’e ita sei haree ida ne’e, sei apronta hotu kedan. Ne’ebé, dentru de prazu ida-ne’e, Maiu to’o meadu fulan jullu ne’e ita tenke konklui ona,” Lídia Norberta informa tán.

Jornalista: Rogério Pereira Cárceres