Hatutan.com, (05 Jullu 2022), Díli—Asosiasaun Turizmu Relijiozu Timor Leste (ATR-TL) no Ekipa Kay Rala Xanana Gusmão realiza taxa Avô Nana ba modalidade korál hodi promove Fraternidade Umana ne’ebé Timor-Leste adopta.

Asosiasaun Turizmu Relijiozu Timor Leste (ATR-TL) no Ekipa Kay Rala Xanana Gusmão hahu hala’o reuniaun atu realiza taxa Avô Nana ba modalidade korál hodi promove Fraternidade Umana ne’ebé Timor-Leste adopta, Novu Turizmu, Tersa (05/07/2022).

ATR-TL harii hosi relijiaun lima ne’ebé eziste iha Timor-Leste ho lema FUAN. Signifika, Fiar, Uniaun, Amizade no Natureza.

Lee Mós:Fraternidade Umana Konfirma Vokasaun TL ba Rekonsiliasaun

Fiar nu’udár opsaun ida ba moris hodi promove valores kulturál, sosiál, relijiozu no liliu fiar nia vertude sira tanba ema hola illas Maromak nian.

Hosi fiar lori ema ba unidade iha diversidade, kultura, rasa no kor oin-oin, ne’e tenke halo ema unidade tanba umanidade ne’e ida de’it no hosi ne’e lori ema ba amizade no iha amizade ema la haree ona ba buat seluk, hotu-hotu hanesan maun-alin tuir Fraternidade umana ne’ebé mak Amu Papa Francisco promove daudaun atu oinsa mak mundu ne’e haree-malu hanesan maun-alin.

Hosi ne’e lori ema ba finalidade ida maka natureza umana liga ba istória, nasaun, riku-soin no buat hotu inklui isin lolon rasik mak natureza umana.

Buat sira ne’e hotu sei kompletu bainhira liga ho natureza divina, katak buat hotu mai hosi ida ne’ebé as liu mak Maromak.

Ho sentidu sira ne’e hotu maka ATR-TL agradese ba konfiansa ne’ebé ekipa avô Nana fó atu ATR-TL promove no konsolida Fraternidade Umana liu hosi desportu muzika.

ATR-TL hamutuk ho ekipa Avô Nana sei hala’o atividade sira seluk tuir-mai liu hosi talentu no valores kulturais atu diverte mundu ida mais umanu no sólidu iha fraternidade no solidariedade.

“Ami laiha interese ba buat sira seluk. Ami la ida ne’e ga ida ne’eba no la inklina an iha grupu ida, maibé puramente ho moral, espirituál apoiu divertimentu espiritual atu ema la’o hamutuk hanesan maun-alin,” Prezidente deliberativu ATR-TL, Pe. Angelo Salsinha hateten iha Otél Novo Turizmu, Tersa (05/07/2022).

Atividade ne’e nu’udár kontinuasaun hosi atividae sira ba selebrasaun aniversáriu Avô Nana nian ne’ebé selebra liu ba no atividade sira ne’ebé sei halo tuir mai nu’udár inisiu atu kontinua promove talentu timoroan sira nian.

Kompetisaun korru no vokál grupu ne’ebé ATR-TL no ekipa Avô Nana organiza sei konsentra iha Dili no vokal grupu sei foku ba ensinu sekundária sira iha Dili no koru sei fó oportunidade ba joven sira hotu inklui mós ba komunidade relijiozu sira hosi Muslumanu, Protestante, Konghusu, Katóliku no mos Budha.

Ekipa Avô Nana ne’ebé reprezenta hosi Francisco Kalbuadi Lay konsidera kompetisaun ne’e atu motiva foinsa’e, estudante no joven relijiozu sira espresa sira nia talentu tanba Timor Leste foin hakat liu laloran boot Covid-19 tanba ne’e tenke la’o ba vida normál.

“Moralmente ami sente onradu tebes bele servisu hamutuk ho ATR-TL bele halo atividade ida ne’e hodi motiva ita nia joven sira atu haree ba oin ho vizaun luan,” Francisco Kalbuadi Lay hateten.

Fundus ba realizasaun atividade kompetisaun taxa Avô Nana parte ART-TL no Ekipa Avô Nana servisu hamutuk no ekipa avô Nana fasilita de’it saida mak presiza no servisu hotu sei entrega ba iha ekipa komisaun organizadora.  

Iha parte seluk reprezentante relijiaun Muslumanu iha Timor Leste, H. Abdullah Said Sagran hateten, bainhira ko’alia kona-bá valores relijiozu, relijiaun sira hotu kuaze hanesan tanba ne’e atividade komun sira ne’ebé atu realiza sei promove konvivénsia komun no iha doutrina Islámiku hakerek iha Alkuran umanidade hotu hanesan de’it, laiha diferénsa no mesak maun-alin de’it tanba ne’e agradese ba ekipa Avô Nana ne’ebé realiza kompetisaun ne’e.

“Ami prontu atu partisipa tanba hare ba valor hosi atividade ne’e sei lori propozitu foun ba Timor Leste,” Abdullah Said Sagran hateten.

Reprezentante Igreja Protestante Timor-Leste, Pastor (IPTL) Lorenço dos Santos agradese ba Maromak tanba ekipa Avô Nana no ATR-TL hala’o atividade kompetisaun ne’e.

Buat importante hosi atividade ne’e mak unidade no fraternidade umana ne’ebé sai importante entre ema ho ema.

Liu hosi atividade sira ne’e mós bele hametin relasaun ema nian no hametin unidade iha fiar tamba ne’e hosi IPTL apoiu ba atividade ida ne’e.

“Ita agradese ba Maromak atu ho apoiu tomak ita bele sai parseiru ne’ebé diak ba future,” nia agradese.

Reprezentante Igreja Konhusu Timor Leste Kathleen Gonçalves hateten Fraternidade umana nu’udár mensajen ida ne’ebé nakonu ho domin no pas no ida ne’e importante ba nasaun hotu atu ema bele hametin diak liutan relasaun amizade.

“Liu hosi atividade ne’e ita bele hametin liutan relasaun fraternidade ba pas no amizade tanba ne’e ami mai apoiu atu lori inisiativa ida ne’e ho di’ak ba oin,” Kathleen Gonsalves hateten.

Kompetisaun korru no vokál grupu ba taxa Avô Nana ba kada manan na’in sei hetan prémiu hanesan osan, tasa avô Nana inklui sertifikadu ba manan nain sira hosi avô Nana.

Rejistu ba kompetisaun ne’e sei hein anunsiu hosi komisaun organizadora ne’ebé parte ATR-TL mak sei haree direta.

Jornalista: Vito Salvadór