Hatutan.com, (06 Jullu 2022), Díli-Ekipa fiskalizasaun konjunta kompostu hosi Comissão Função Pública (CFP), Comissão Anti Corrupção (CAC), Provedória dos Direitos Humanos e Justiça (PDHJ) ho Inspesaun Jerál Estadu (IJE), Kuarta (06/07/2022),  hala’o inspesaun direta bá servisu  Comissão Nacional de Aprovisionamento (CNA).

EDifisiu CNA. Foto/Hatutan.com

Iha inspesaun no fiskalizasaun ne’e, ekipa konjunta deteta katak iha funsionáriu na’in-38 mak nomeia de’it hosi Ministru Finansas (MF), Rui Augusto Gomes, ne’ebé la kumpre prosedimentu administrativu iha Rejime Jerál Funsaun Públiku nian.

Funsionáriu sira ne’e, na’in-rua (2), asume pozisaun nu’udár kargu ka xefia ka ezekutivu hodi lidera CNA, ida (1) destaka duni iha MF, no na’in 35 seluk, nu’udár funsionáriu baibain hodi servisu iha CNA, Balíde, Díli.

Tuir lei Funsaun Públika, sidadaun ne’ebé mak hetan fiar atu lidera iha instituisaun direta sira hanesan CNA, tenke ema funsionáriu públiku no funsionáriu permanente, la’ós sidadaun baibain.

Advertisement

Komisáriu CFP, António Freitas, esplika, ekipa fiskalizasaun konjunta ninia prezensa iha CNA, atu husu informasaun sira mak espesialmente ligadu ho kuadru pesoál sira, kargu xefia iha diresaun sira ne’ebé mak hala’o kna’ar iha CNA, prevalese duni tuir sira ninia rejimentu interna iha instituisaun ne’e ka lae.

Inspesaun ekipa konjunta nian ne’e atu haree bá natureza mudansa hosi organigrama iha instituisaun Estadu sira, inklui mudansa bá dekretu lei Oitavu Governu Konstitusionál nian katak, administrasaun direta hanesan CNA tutela bá iha MF.

Durante fiskalizasaun ne’e, funsionáriu ka kargu xefia sira iha CNA deklara bá ekipa konjunta katak, nu’udár administrasaun direta ida, sira aplika termu sertu hotu.

Ba aktu nomeiasaun ‘polítika’ iha administrasaun direta ne’e, Komisáriu António Freitas, dehan, CFP preokupa, tanba ne’e, hakarak ka lakohi, tenke armoniza hotu kondisaun sira ne’e.

Bazeia bá deklarasaun sira hosi parte CNA katak, Ministru Finansas, Rui Augusto Gomes, mak fó despaxu, hodi delega Hermingaldo Albado Soares, bá diretór CNA. La’ós ne’e de’it, governante ne’e mós nomeia pesoál balu, nu’udár koordenadór bá diresaun balu iha MF.

Advertisement

Komisáriu CFP, António Freitas. Foto/Hatutan.com

“Kargu lista ne’ebé mak ami iha, hamutuk ema na’in-38 ne’ebé mak funsionáriu ka kargu pesoál iha CNA, no mós kargu tolu ne’ebé mak señór ministru Rui Augusto Gomes uza nia kompeténsia tomak, hodi nomeia ka koordena atividade servisu ne’ebé mak fatin mamuk bá ne’e. Bazeia bá sira nia esplikasaun, nune’e,” António Freitas, hateten bá jornalista sira, hafoin fiskalizasaun iha CNA.

Molok desizaun bá nomeasaun ne’e, Ministru Finansas, Rui Augusto Gomes, hato’o duni karta koñesimentu ida bá CFP atu bele husu autorizasaun. Maibé, parte CFP rejeita ka la konkorda dala-rua, tanba tuir  lei, ema ne’ebé atu lidera iha instituisaun públika sira ne’ebé mak ho ninia administrasaun direta hanesan CNA, tenke ema funsionáriu públiku no permanente. La’ós ajente, no la’ós kazuais.

“CFP preokupa uitoan situasaun CNA nian ne’e, tanba ami halo korrespondénsia dala-rua ona, para husu bá ita nia sua-exelénsia ministru finansas, para atu bele esplika servisu ida ne’e. Maibé  defaktu ami laiha resposta kona-bá karta delegasaun ka kompeténsia, no delegasaun nomeasaun bá koordenadór sira, inklui diretór CNA. Maibé, CFP antes ida ne’e, rejeita kargu ida ne’e,” Komisáriu António Freitas hateten.

Iha fatin hanesan, diretór jerál bá Prevensaun iha CAC, Rosário Salsinha Araújo, dehan, atividade inspesaun ida ne’e, nu’udár asuntu preventiva ida, atu nune’e, bele hadi’a sistema iha instituisaun públiku sira Estadu nian, liu-liu hanesan CNA, tanba baibain instituisaun sira ne’e mak halo jestaun bá sasán sira Estadu nian.

Diretór Jerál bá Prevensaun iha CAC, Rosário Salsinha Araújo. Foto/Hatutan.com

“Mais ohin, ita mai iha ne’e, CNA nian, tanba iha informasaun balu ne’ebé mak liga sira nia servisu rasik iha ne’e. Tanba ne’e mak ita nia prezensa iha ne’e, atu bele mai konfirma, no bele ajusta mós ho dokumentu sira ne’ebé ita hetan, no ita mós husu bá sira para atu prepara mós dokumentu sira ne’ebé instituisaun sira presiza, bele solisita ba CFP, nune’e ita bele kompleta, hodi halo análize balu bá servisu saida de’it maka di’ak no ladi’ak iha instituisaun ida ne’e,” diretór jerál bá Prevensaun iha CAC, Rosário Salsinha Araújo, hateten.

Durante fiskalizasaun, ekipa konjunta konsege rekolla dokumentu balu ne’ebé relevante ho prosesu nomeasaun bá funsionáriu sira hamutuk na’in 38 ne’e.

Ekipa fiskalizasaun konjunta, sei halo análize hamutuk bá dokumentu eskrita sira ne’e, no bainhira prova hatudu katak, prosesu sira ne’e la la’o tuir rejimentu ka lei sira ne’ebé iha, sei solisita karta bá ministériu atu kompleta dokumentu, durante loron 10 nia laran, sura hosi loron submisaun pedidu.

Advertisement

Jornalista: Rogério Pereira Cárceres