Hatutan.com, (07 Jullu 2022), Díli-Komandu Polísia Nasionál Timor-Leste (PNTL) liuhosi Servisu Informasaun Polísia (SIP) kaptura ona autór ho inisiál LVM (25), ne’ebé mak harahun vidru karreta no foti laptop iha área Kristu Rei, Díli.

SIP Kaptura Autór LVM Ne’ebé Harahun Vidru Karreta no Foti Laptop iha Kristu Rei. Foto/Espsiál

Autór ne’e, ekipa sira Servisu Informasaun Polísia (SIP) nian kaptura iha Kuarta (06/07/2022), tuku 20:00 Otl, iha área Bairru dos Grilhos, Suku Gricenford, Postu Administrativu Na’in-Feto, Munisípiu Díli.

“Iha lokál kapturasaun, suspeitu deklara katak, nia mak baku rahun no foti duni laptop ida iha arredores Kristu Rei, baku rahun karreta Dilicious no foti laptop no telefone ida iha area Sporting kruzamentu BNU tun bá Porto Dili inklui telefone ida, enkuantu iha area Audian no Kuluhun baku rahun karreta maibé la konsege foti sasán,” sita iha komunikadu imprensa husi relasaun publika Ministériu Inteirór ne’ebé Hatutan.com asesu.

Hafoin halo kapturasaun, SIP diretamente entrega kedan autór  bá Servisu Investigasaun Kriminál Nasional (SIKN), hodi hala’o investigasaun no entrega ona bá Komandu Munisípiu Díli hodi halo detensaun durante oras 72, antes submete bá Tribunál Distritál Dili (TDD).

Operasaun ida ne’e realiza tanba halo ona koordenasaun ho autoridade judisiária kompetente no oras ne’e daudaun Komandu PNTL hatún ona diretiva áa Komandante SIP hodi intensifika operasaun, nune’e bele buka tuir autór sira seluk ne’ebé mak involve ho kazu ne’ebé hanesan.

Jornalista: Rogério Pereira Cárceres