Hatutan.com, (25 Agostu 2021), Díli-Konsellu Ministru, kuarta (25/08/2021), aprova projetu Rezolusaun Governu ne’ebé impoin konfinamentu domisiliáriu jerál  ba populasaun iha Munisípiu Dili, hahú hosi tuku 00:00, loron 27 fulan-agostu to’o tuku 23:59,  loron 02 fulan-setembru tinan 2021.

Governu impoin konfinamentu domisiliáriu jerál  ba ema hotu ne’ebé maka hela ka agora daudaun iha Munisípiu Dili, ne’ebé tenke hela iha sira-nia uma ka iha sira-nia alojamentu temporáriu, ne’ebé inklui sentru akollamentu, exetu iha situasaun ne’ebé prevee iha diploma ne’e, liuliu tanba razaun saúde, serbisu, asesu ba sasán no servisu nesesidade bázika nian no simu vasina kontra COVID-19.

Iha área hotu-hotu Munisípiu Dili nian, Governu bandu atu transporte públiku, liuliu taxi, mikrolete, biskota no angguna halo sirkulasaun.

Liuhosi komunikadu imprensa ne’ebé Hatutan.com  asesu hosi Konsellu Ministru iha Palaço do Governo, relata mós katak Governu suspende selebrasaun relijioza koletiva, no bandu mós atu hala’o serimónia funerál ne’ebé envolve partisipasaun ema na’in-10 liu, sira ne’ebé, durante serimónia ne’e rasik tenke uza máskara oin nian hodi taka inus no ibun no mantein distánsia, pelumenus metru ida ho ema seluk ne’ebé prezente iha serimónia ne’e.

Estabelesimentu komersiál, industriál, artezanál ka prestasaun servisu nian taka ba públiku, ho exesaun ba estabelesimentu sira ne’ebé autoriza iha Rezolusaun Governu ne’e, liuliu estabelesimentu ne’ebé fa’an ai-han no sasán nesesidade bázika nian, eletrisidade, telekomunikasaun, prestasaun kuidadu médiku, farmásia, postu kombustivel nian, no instituisaun finanseira sira.

Restaurante sira bele fornese hahán  iha rejime take away (lori ba uma) ka entrega iha uma de’it no estabelesimentu sira-seluk ne’ebé taka ba públiku bele dezenvolve ninia atividade liuhosi servisu entrega ba uma de’it.

Vendedór ambulante ba sasán alimentár no sasán ba nesesidade bázika bele mantein sira-nia atividade. Merkadu sira munisípiu nian, Manleuana no Taibessi, mantein ninia funsionamentu, husi tuku 6 dadeer to’o tuku 6 loro-kraik.

Governu hola desizaun ne’e relasiona ho númeru kazu pozitivu COVID-19 ne’ebé sa’e maka’as iha territóriu Timor-Leste, liuliu iha Kapitál Dili.

Dadús COVID-19 hosi SS-CIGC

Covid-19 variante delta.

Sala Situasaun Sentru Integradu Jestaun Krize (SS-CIGC, sigla portugés), to’o tersa (24/08/2021), rejista kazu óbitu (ema mate) ho Covid-19 na’in-rua (2), pozitivu 532, rekuperadu 97 no kazu ativu 3.816.

Totál óbitu ne’ebé relata hosi SS-CIGC, tersa horiseik, primeiru mai feto, ho idade 35, timoroan, hela iha Dili, seidauk vasina, iha 22 agostu 2021, diagnóstika Síndroma Insufisiénsia Respiratória Aguda (SIRA) tanba COVID-19 (PCR pozitivu, CT Egene 22), no hahú halo tratamentu iha Lahane, iha loron ne’e kedan.

Tersa dadeer, purvolta tuku 05:10 Otl,  matebian iis-kotu no família koordena hela ho ekipa saúde atu hala’o funerál tuir protokolu ne’ebé adopta iha Timor-Leste.

Segundu mane ho idade 65, hela ida Dili, seidauk vasina, iha 23 agostu  2021, diagnóstika Síndroma Insufisiénsia Respiratória Aguda (SIRA) tanba COVID-19 (Rapid Antigen Test Positive), no hahú halo tratamentu iha Lahane, iha loron ne’e kedan.

Kazu foun ne’ebé SS-CIGC rejista iha tersa (24/08/2021), hamutuk kazu 532 hosi Dili 298, Baucau 90, Covalima 75 no munisípiu seluk  hamutuk 69 ne’ebé kompostu hosi mane 335  no feto 197.

Hosi totál kazu detetadu foun, tersa horiseik, ho idade 20-122 (23,8) ho idade entre 12-59 na’in 393 (73,68%), idade 60 mai kraik  na’in-17. Hosi kazu detetadu foun, tersa ne’e, 202 kazu  ka 38% sintomátiku (hatudu sintoma).

Kumulativu kazu konfirmadu sura hosi 21 marsu 2020 to’o 24 agostu 2021 hamutuk 14.935. Hosi segunda (23/08/2021) mai to’o tersa (24/08/2021), teste ne’ebé Laboratóriu Nasionál Saúde halo hamutuk 1.388 PCR, ho detallu hanesan tuir-mai, Vijilánsia sentinela na’in 122, rastreiu ba kontaktu ka Contact tracing 412, Rastreiu Aleatóriu ka Random Screening nain 315, viajen sai-hosi serka sanitária hosi Dili 248, Viajen internasionál 238, follow-up iha kuarentena na’in-lima (5).

Totál testes PCR ne’ebé halo segunda-tersa (23-24/08/2021), iha munisípiu-sira seluk, RAEOA no HNGV hamutuk 506, ho detalla hanesan tuir-mai, Maubisse 36, Bobonaro 47,  Viqueque 11, Covalima 148, Baucau 92, Ermera 15, RAEOA 24, HNGV 117 no Lautem 16. (bit)