Hatutan.com, (21 Setembru 2021), Díli– Rezultadu avaliasaun servisu Gabinete Inspesaun no Auditóriu (GIA), Ministériu Justisa nian, deskobre guarda prizionál na’in tolu iha Estabelesimentu Prizionál Becora komete infrasaun.

Medida ne’ebé Ministériu Justisa (MJ) foti maka muda ka koloka fali guarda prizionál na’in tolu ne’e ba fatin seluk, maibé nafatin iha MJ nia okos.

Atu evita infasaun beibeik, Ministériu Justisa  halo esforsu hotu hodi trasa programa formasaun ba guarda prizionál sira hodi bele ajuda hasa’e sira-nia koñesimentu ba regulamentu no rejime espesiál ne’ebé aplika iha prizaun laran.

“Formasaun ne’e sai hanesan mata dalan ba servisu operasionál iha Estabelesimentu Prizaun Becora hodi hatene no halo kontrolu no jestaun risku ba sira-nia knar loron-loron nu’udar guarda prizionál, nune’e evita iha infrasaun, tanba na’in tolu ne’ebé ha’u la bele temi naran komete ona iha infrasaun,” Lucas António da Costa, Inspektór GIA hateten iha ninia intervensaun ba formasaun ba guarda prizionál sira iha prizaun Becora, Tersa (21/09/2021).

Komisáriu Asuntu Protokolu no Formasaun Disiplinár Komisaun Funsaun Públiku (CFP, sigla portugés), António Freitas, enkoraja guarda prizionál sira atu hateten lae ba polítiku sira, tanba guarda prizionál nain tolu ne’ebé komete infrasaun ne’e tanba sira sai vítima ba polítiku nain sira.

“Guarda prizionál sira tenke hateten lae ba polítiku nain sira, labele ta’uk hodi mai viola fali imi nia direitu hodi mai buka fali votu iha prizaun laran,” António Freitas tenik.

Daudaun ne’e, guarda prizionál hamutuk 134 ne’ebé haknaar  iha Estabelesimentu Prizaun Becora.

Prizaun Becora rejistu dadur 521

Iha tinan 2021 Estabelesimentu Prizaun Becora rejistu dadur hamutuk 521, kompostu husi primeiru prizaun kondenadu ema na’in 404 ne’ebé mai husi krime droga, ema nain tolu, menoridade 29, segundu prizaun preventiva ema na’in 117 kompostu husi ema estranjeiru na’in 10, eis membru PNTL na’in hitu (7), no F-FDTL na’in tolu (3) no feto na’in rua (2).

Dadur ne’ebé tama foun na’in 83, dadur liberdade 103 no mate na’in haat (4).

Direktur Prizaun Becora, João Domingos informa iha mudansa barak ne’ebé akontese ba dadur sira durante ne’e, tanba sira iha vontade atu anima liuhusi kanta, no halo poezia uainhira iha atividade iha prizaun laran no sira hotu hakarak partisipa. (car)