Hatutan.com, (13 Outubru 2021), Díli-Santa Krús FC hatudu nia superioridade iha grupu B ba jogu dahuluk Liga Timor Leste hafoin akumula pontu tolu manan Kablaki FC  3-1 iha jogu Liga Timor Leste.

Notísia iha Relasaun : Liga Timor Leste, Porto Taibesi Manan Zebra 1-0

Emiliando Soares, Jogadór Santa Krús FC marka golu ba Kablaki FC. Foto LFTL/Abílio Gonçalves

Jogu ne’ebé hala’o iha Estádiu Munisipál Díli, Kuarta (13/10/2021), Santa Krús FC konsege konkista nia adversáriu Kablaki FC hodi hadau pontu no lidera klasifikasaun iha grupu B.

Iha jogu primeira parte, Santa Krús lansa kedas ameasa iha minutu tolu. Nune’e, Kablaki FC responde kedas liu husi bola kantu. Kablaki  hetan oportunidade liuhusi bola “dua sentuhan” iha grande área Santa Krús nia,n maibé jogadór David Asunção la aproveita oportunidade osan-mean ne’e ho di’ak ikus mai baliza konsege salva bola.

Liu de’it minutu balun, Santa Krús responde ho ameasa husi Emiliando Soares maibé larezulta golu tamba baliza antesipa bola ho diak.

Santa Krús nafatin fo presaun ba iha liña Kablaki nian liu husi jogadór Emiliando Soares ne’ebé iha kombinasaun di’ak nia maluk avansadu Alexandere Corsino.

Oportunidade di’ak ba Kablaki mosu hikas hafoin sira hadi’a sira nia liña. Jogadór Anjelito Oliveira ne’ebé aproveita bola kantu ho sutu primeiru ne’ebe nia lansa maibé bola sei semo liu de’it no la fó ameasa ba  baliza Santa Krús.

Santa Krús halo esforsu maka’as no lansa hikas kontra atake dala rua tuituir malu liu husi jogadór Alexandere Corsino Emiliando Soares.

Treinadór Kablaki hola inisiativa hodi halo substituisaun ba nia jogadór iha liña kotuk hodi dada sai defeza sentral Januário Fernandes no hatama Frazao Lopes ho intensaun bele asegura Kablaki  husi Santa Krús nia jogadóe sira ne’ebé sempre fó presaun ba baliza Kablaki nian.

Rede Kablaki nian nakdoko hafoin hetan fura husi jogadór Elimiliando Soares liuhusi kombinasaun ne’ebé iha ho jogador Liborio Jeronimo, nune’e score provizóriu Santa Krús lidera ho  golu 1:0.

Golu ne’e la hamihis espíritu jogadór  Kablaki nian. Sira mantein ho ritmu jogu no halo esforsu hodi  hetan oportunidade atu bele prodús golu.

Jogadór Kablaki sira-nia esforsu la hela nune’e de’it. liuhosi oportunidade bola kantu, jogadór Angelito Oliveira  aproveita másimu hodi fura kedas rede Santa Krús nian hodi dudu score ba 1:1 to’o jogu termina primeira parte nian mantein skore  ne’e.

Hakar ba segunda parte, ekipa rua joga ho ritmu as no kada ekipa halo kontra atake ba malu. Kablaki f konsege marka golu ida maibé invalidu tanba jogador Pedro da Cruz konsidera iha pozisaun offside.

Liu de’it minutu balun Santa Krús  hatudu nia superioridade hodi muda skore ba 2:1 liuhusi jogadór Alexandre Corsino.

Kablaki nafatin hadi’a nia liña hodi halo tan substituisaun ba jogadór iha kada  liña hodi dada sai Pedro Fernandes no hatama Leonito dos Santos.  Tuir kedas iha minutu 55 dada sai tan jogadór David Asunção no Renzo Coreia.

Ho substituisaun sira ne’e la lori anin di’ak ba ekipa Kablaki tamba ritmu jogu nafatin iha pozisaun tun kompara ho minutu antes.

Ekipa Santa Krús  mós halo substituisaun ba jogadór tamba hetan aleija kauza husi kolen ho nune’e iha minute 61 halo substituisaun dada sai Elroy Braz no hatama Deonidiu Maia, hodi reforsa iha parte médiu avansadu.

Kablaki mós  kontinua ho substituisaun hodi dada sai-nia jogadór nain rua; Angelito Oliveira no Acoli no treinadór deside aumenta médiu no defeza hodi hatún  José Soares no Edy Gusmão.

Iha minute 78, Santa Krús hetan oportunidade osan-mean liu husi bola mão iha grande área Kablaki no jogadór Liborio Geronimo uza oportunidade ne’e hodi marka golu liuhusi penalidade no muda score ba 3:1.

Hafoin terseiru golu ne’ebé santa Cruz prodús parte ekipa téknika liuliu treinadór halo kedas substituisaun ba nia jogadór sira hodi hasai Alberto Fernandes no João Paulo Sousa hodi hatama Januario Cabral no Denilson Almeida, ho intensaun bele asegura Santa Krús nia pontu ne’ebé iha.

Rezultadu 3:1 ne’e mantein to’o tempu normal termina. Situasaun ne’e lori Santa Krús lidera provizóriu tabela klasifikasaun iha grupu B.

 “Ami nia ekipa laiha armonizasaun jogu ne’ebé di’ak iha kampu-laran, nune’e ami laiha kbiit atu bele konkista jogu kontra Santa Krús FC” hateten João Fernandes, treinadór Kablaki FC.

Parte seluk treinadór Santa Krús orgullu ho rezultadu ne’ebé iha no nia promete sei hadi’a an di’ak liután hodi enfrenta jogu sira tuir mai.

Jornalista : Vito Salvador