Hatutan.com, (04 Novembru 2021), Baucau—Papa Francisco hato’o sentida kondolénsia kle’an ba sarani no Igreja Timor-Leste (TL), ne’ebé sente lakon Dom Basílio do Nascimento, Bispu Dioseze Baucau.

Reprezentante Santa-Sé iha Timor-Leste, Mgr Marco Sprizzi. Foto/Facebook.

Mensajen kondolénsia kle’an ne’e hato’o hosi reprezentante Santa-Sé iha Timor-Leste, Mgr Marco Sprizzi, iha ámbitu misa funerál ba mate-isin Dom Basílio do Nascimento, iha Igreja Katedrál Santo António, Baucau, Kinta (04/11/21).

Notísia iha Relasaun: Maromak Mak Hun no Rohan ba Ema nia Moris

“Iha momentu sofrimentu profunda Igreja Timor nian, Papa Francisco hato’o nia sentida profunda kondolénsia ba Bispu-sira, relijiozu no relijioza-sira, ba sarani sira no ema fiar na’in tomak ne’ebé sente lakon saudozu Dom Basílio do Nascimento,” Mgr Marco Sprizzi, hato’o mensajen Papa Francisco.

Dioseze Baucau mós iha ona Administradór Diosezanu ne’ebé hili hosi koléjiu konsultores nu’udár prova maturiodade Igreja lokál nian, tanba ne’e lori Santu Padre nia naran Mgr Marco Sprizzi enkoraza atu Padre no Madre sira hamutuk ho sarani tomak apoia servisu ne’ebé oras ne’e tula hela ba Padre Alípio Pinto Gusmão, hodi hein nomeasaun no instalasaun ba Bispu foun.

“Momentu sira hanesan ne’e, tenke sai hanesan momentu unidade, kolaborasaun no rekonsiliasaun ba esforsu-sira ba di’ak povu sarani nian, nu’udár testamuña Evanjelizasaun ohin loron nian,” Mgr Marco Sprizzi, enkoraza.

Papa Francisco mós husu atu tau laran nafatin ba Maromak Nia laran luak, tanba Nia nunka husik Nia povu moris mesak iha susar nia laran. Hakas an nafatin atu sai masin no roman mundu nian.

PN Aprova Votu Pezar

Misa funerál ba mate-isin Bispu Dioseze Baukau, Dom Basílio do Nascimento, iha Igreja Katedrál Santo António, Baukau, Kinta (04/11/21). Foto/Facebook.

Parlamentu Nasionál (PN) aprova ona votu pezar ba Bispu Dioseze Baukau, saudozu Dom Basilio do Nascimento ho ho saudozu Max Stahl, liu hosi plenária estraordinária, iha Kuarta (03/11/21).

Aprovasaun votu pezar ho rezultado votasaun a-favor 56, kontra 0 no abstensaun 0 ba matebian na’in-rua ne’e nu’udár sentidu  kondolénsia kle’an hosi Estadu TL ba família matebian.

Liu tan ida ne’e, atu dignifika mós kontribuisaun hosi mate-bian na’in-rua durante luta libertasaun patria, tanba defende umanidade liu hosi filmajen masakre 12 Novembru 1991 inklui situasaun terus povu TL nian  hodi hatudu ba mundu.

Alende ne’e, Aprovasaun votu pezar ba matebian Dom Basilio do Nascimento atu dignifika kontribuisaun Igreja Katólika.

Votu pezar ho númeru 29 ba Max Stahl nia mate no númeru 30\V  ba Dom Basilio do Nascimento aprovadu.

Jornalista: Vito Salvadór