Hatutan.com, (09 Novembru 2021), Dili—Polísia Nasionál Timor Leste (PNTL) munisípiu Baucau, seidauk hetan suspeitu ne’ebé tá’a Joven ida ho naran Rider Mateus da Costa Correia (RMDC) iha parte matan-laran, iha 08 Novembru 2021, tuku 22:30, iha Suku Tirilolo, Postu Administrativu Baucau, Munisípiu Baucau.

Vitima Joven ida ho naran inisiál RMDC ne’ebé hetan taa hosi ema deskonñesidu iha Tirilolo. Foto/Facebook.

Oras ne’e daudaun komandu Munisípiu Baucau, kontinua buka-tuir hela suspeitu atu kaptura, hodi prosesa tuir lei.

“Polísia Investigasaun Kriminál Baucau sei buka-tuir hela suspeitu hodi identifika kauza loloos. Suspeitu seidauk hatene iha ne’ebé,” Portavóz Komandu Jerál PNTL, Superintendente Xefe Polísia, Arnaldo de Araújo  hateten liuhosi konferénsia imprensa, iha Komandu Jerál PNTL Caicoli, Tersa (09/11/21).

Provizoriamente informasaun ne’ebé Komandu Jerál PNTL simu hosi Komandu munisípiu Baucau katak, kazu ne’ebé mosu iha área Tirilolo ne’e, la’ós involve hosi membru Grupu Arte Marsial (GAM) ruma, maib’e mosu ho espontánea.

“Informasaun ne’ebé ohin komandante munisipiu fó, dehan katak, asaltu ida-ne’e espontánea. Ema ne’e ba ho motór, para hela iha fatin ida entaun ema ne’e to’o mai halo asaltu de’it ba vítima,” Portavóz PNTL ne’e informa.

Oras-ne’e, komandu jerál PNTL fó ona orientasaun ba komandu munisipiu Baucau no munisipiu hotu-hotu atu bele hasa’e volume patrullamentu ka operasaun iha bairru, nune’e bele evita konflitu mosu beibeik, tanba realidade hatudu katak, durante ne’e krime mosu tiha mak Polisia mosu.

Alende ne’e, Komandu Jerál mós alerta on aba Serbisu Intelijénsia atu halo kontrolu ho maka’as, no Ofisiál Polisia Suku (OPS)  tenke fó informasaun barak ba komunidade, nune’e bele intende didi’ak kona-bá saida mak estabilidade.

Jornalista: Roger Cárceres