Hatutan.com, (17 Novembru 2021), Dili—Comissăo Anti Corrupçăo (CAC), halo ona análiza bá karta keixa hosi Forum Organizasaun Naun Governamentál Timor-Leste (FONGTIL) nian, hasoru membru Governu na’in-hitu ne’ebé partisipa iha Expo Dubai.

Bidu biti ne’ebé delegasaun Timor Leste aprezenta iha Expo Dubai 2020. Foto/Facebook.

“Ita simu keixa, ka denunsia sira, la’ós fásil. Tenke halo analiza,” Komisáriu CAC, Sergio Hornai hateten ba jornalista sira iha Centro Formaçăo Policia (CFP), Akademia Komoro, Kuarta (17/11/21).

Notísia iha Relasaun:Delegasaun Expo Dubai Prontu Koopera ho CAC kona-bá Keixa FONGTIL

Ho karta keixa hosi FONGTIL, CAC sei presija rekolla tán informasaun hosi parte oioin, nune’e kompleta investigasaun.

Advertisement

“Prosesu investigasaun la’o hela, sei iha ema barak mak ita sei husu tán,” Sérgio Hornai, informa.

Iha Kinta (21/10/2021), Diretór Ezekutivu FONGTIL, Daniel Santos do Carmo, hato’o keixa ba CAC iha Edifísiu, Faról, Dili, husu atu halo detensaun ba membru Governu na’in-hitu ne’ebé ba partisipa iha expo Dubai durante semana ida tanba hamosu prejuizu boot ba Estadu TL.

Detensaun no kapturasaun ne’e, la signifika atu lori kedan sira ba tribunál ka ba kadeia, maibé atu prosesa sira tuir padraun legál ne’ebé CAC iha no karik evidénsia sira ne’ebé FONGTIL hato’o mak prienxe duni rekezitu katak sira komete duni irregularidade ruma, kabe ba kompeténsia CAC nian.

Kona-bá konteúdu keixa ka ezijénsia ne’ebé Fongtil hato’o ba CAC seidauk bele pronúnsia ba públiku tanba segredu justisa.

Komisáriu CAC, Sergio Hornai. Foto/CAC.

CAC hatam keixa bazeia ba kódigu penál Timor-Leste, artigu 214, fó dalan ba ema indivíduu, koletiva, sidadaun sé de’it bele hato’o keixa ba polisia espesiál kombate korrupsaun hanesan CAC, bainhira deskonfia katak atus ka partisipasaun expo Dubai nian fó prezuiju ba Estadu.

Iha 21 Outubru 2021, Ministru Koordenadór Asuntu Ekonómiku (MAKE), Joaquim Amaral, ne’ebé xefia delegasaun membru Governu na’in hitu ho ema 120 ba Expo Dubai, deklara  katak,   Estadu no  kualkér membru Estadu prontu ba kualkér situasaun.

Advertisement

Membru Governu na’in-hitu ne’ebé partisipa iha Expo Dubai mak hanesan Ministru Koordenadór Asuntu Ekonómiku (MKAE), Joaquim Amaral, Ministru Transporte no Komunikasaun (MTK),  José Agostinho da Silva, Ministru Turizmu (MT), José Lucas do Carmo da Silva, Ministru Petróleu no Minerais, Victor da Conceição Soares, Ministru Agrikultura no Peska, Pedro dos Reis, Vise-Ministru Turizmu, Komérsiu no Indústria, Domingos Lopes Antunes no Vise-Ministru Negósiu Estranjeiru no Kooperasaun (MNEK), Julião da Silva.

Jornalista: Rogério Cárceres