Hatutan.com, (18 Novembru 2021), Dili—DIT FC garante sei rekolla vitória iha jogu dahuluk kontra adversáriu As Ponta Leste FC iha Liga Futeból Timor Leste (LFTL), primeira divizaun ne’ebé sei hala’o iha Sesta (18/11/2021), iha estádiu munisipál Dili, tanba iha ona preparasaun natón.

Jogadór estranjeiru hosi Papua Indonézia, Gilbert Richar Dwaranury ne’ebé DIT FC kontrata. Foto/DIT FC.

Asistente treinadór DIT FC, Samuel António Guterres, hateten atu reforsa ekipa ne’e maka DIT liu hosi manajementu halo ona kontratu ho jogadór estranjeiru na’in-rua mai hosi Papua Indonézia, hanesan Gilbert Richar Dwaranury ne’ebé antes ne’e reforsa DIT FC iha époka 2018 no joga iha parte médiu, enkuantu ba epoka ne’e DIT halo mós kontratu ho avansadu Sewor Mahuse.

Notísia iha Relasaun:Kablaki FC Rekoñese Falla no Husu Deskulpa ba Adeptu

“Ami iha jogadór estranjeiru na’in-rua no durante treinu sira hatudu progresu di’ak no iha adaptasaun lais tebes ho jogadór lokál. Tanba ne’e, ami garante sei manan,” Samuel António Guterres hateten ba jornalista sira iha sede LFTL Bairru dos Grilhos Dili, Kinta (18/11/21).

Ho plantel ne’ebé iha, DIT FC garante sei rekolla vitória no ida-ne’e sei akontese tanba iha jogadór ne’ebé sufisiente.

Iha fatin hanesan, treinadór As Ponta Leste FC, Francisco de Araújo hateten klubu ne’e halo ona preparasaun kuaze fulan rua, nune’e ekipa iha preparasaun di’ak tebes atu joga iha LFTL tinan ne’e.

Durante preparasaun, ekipa tékniku hasoru de’it probrema balun liga ho administrasaun ba jogadór estranjeiru Mohamad Mumi, tanba parte As Ponta Leste iha hela disputa ho Lalenok United FC.

Maski nune’e, situasaun ne’e la lori difikuldade ba ekipa tanba iha ona jogadór suplente ne’ebé ho nia kualidade natón atu joga hasoru DIT FC.

“Ami iha konfiansa boot ba ami nia treinu durante ne’e. Ami iha preparasaun di’ak iha kualidade fiziku no tékniku atu enfrenta batalla iha jogu kontra DIT FC,” Francisco Araújo hateten.

As Ponta Leste FC mós iha plantel di’ak ida no sei hatudu jogu atrativu tuir kualidade ne’ebé iha, atu bele lori satisfasaun ba adeptu sira.

As Ponta Leste FC sei reforsa hosi maioria jogadór lokál, maibé iha kualidade sufisiente atu kompete iha jogu sira époka ne’e.

Jornalista: Vito Salvadór