Hatutan.com, (11 Dezembru 2021), Dili—Problema ódiu-malu pasadu, suspeitu ho inisiál AF (45), óho vítima inan-feton ida ho naran inisíál MF (40), iha aldeia Pai-hira, Suku Cacavei, Postu Administrativu Lospalos, Munisipiu Lautém.

Vítima inan-feton ida ho naran inisíál MF (40), iha aldeia Pai-hira, Suku Cacavei, Postu Administrativu Lospalos, Munisipiu Lautém, Sesta (10/12/21). Foto/PNTL Lautém.

Komandante Polísia Nasionál Timor-Leste (PNTL), Munisípiu Lautém, Superintendente Polísia, António Fernandes, esplika kronolojia katak, iha Sesta 10 Dezembru 2021, maizumenus tuku 10:45 otl, mosu kazu insidente ida ne’ebé involve hosi suspeitu ne’ebé lori katana taa vitima nia liman sorin kotu, no hakanek iha parte kanuruk, to’o hakotu vitima nia vida (mate).

“Kazu omisídiu agravadu  ne’e horseik akontese iha vítima ninia uma. Suspeitu mosu bá, halo kedan asaun no taa vítima mate fatin. Suspeitu uza katana, taa kanek iha vitima ninia liman ne’e kotu liu fahe rua, depois taa tán ninia kanuruk katana tama kle’an,” Superintendente Polísia, António Fernandes, informa ba Hatutan.com, via telefónika, Sábadu (11/12/2021).

Hafoin akontesimentu, Komandu PNTL Munisípiu Lautém, halo kedan atuasaun no vítima rasik transporta kedan mai Hospital Nacional Guido Valadáres (HNGV) iha Dili, hodi submete ba autópsia.

Liuhosi prosesu identifikasaun ba suspeitu, identifika katak, kazu ne’e mosu tanba Suspeitu mane ida ho inisiál AF ho Vítima MF iha problema pasadu, maske sira iha relasaun família rasik. 

“Sira ne’e mai hosi família ida de’it, hanesan maun-alin. Maibé, tanba tuir informasaun ne’e, iha problema singulár sira ne’ebé akontese iha pasadu sai hanesan ódiu ida, to’o akontese omesídiu agravadu ne’e. Problema pasadu ne’e vítima sempre mai keixa iha Polísia, entaun ida-ne’e mak hodi halo suspeitu nervozu, depois hodi halo asaun omesídiu agravadu,” Komandante ne’e esplika.

Ohin Sábadu, 11 Dezembru 2021, Komandu PNTL Munisipiu Lautém, transporta ona suspeitu AF ba Munisípiu Baucau, atu aprezenta kazu ne’e ba Ministériu Públiku (MP), hodi tuir prosesu primeiru interogatóriu.  

Jornalista: Rogério Pereira Cárceres