Hatutan.com, (13 Dezembru 2021), Díli—Proposta Orsamentu Jerál Estadu (OJE) tinan 2022 nian ne’ebé Ministériu Interiór (MI), propoin ba Polísia Nasionál Timor-Leste (PNTL) ho dotasaun inisiál hamutuk $34.082.481, pasa iha diskusaun faze espesialidade, ho rezultadu votasaun afavór 51, kontra 0 no abstensaun 12.

Membru Polísia Nasionál Timor Leste (PNTL), iha Eskuarda Ai-mutin Postu Administrativu Dom Aleixo, Munisípiu Dili, dudu karreta Estadu ne’ebé sira utiliza hodi halo patrullamentu, iha área Edifísiu Eskuadra Ai-Mutin, Novembru 2021. Foto/Facebook.

“Orsamentu ba Polísia Nasionál Timor Leste NTL pasa,” Prezidente Parlamentu Nasionál (PPN), Aniceto Longuinhos Lopes Guterres, deklara iha plenária PN, Segunda (13/12/2021).

Notísia iha Relasaun:Koñese Deviza PNTL no Formasaun atu Lidera Eskuadra to’o Komisáriu

Hafoin rona tiha rezultadu votasaun ne’e, deputadu hosi bankada Partidu Demokrátiku (PD), Mariano “Assanami” Sabino, konsidera seguransa marítima nu’udár serbisu ida ne’ebé perigu tebes. Bainhira kontese udan-boot, bele lori ameasa ba ema nia vida.

Tanba ne’e, bankada PD husu ba membru PNTL sira, liuhosi Unidade Polísia Marítima (UPM), atu serbisu hamutuk ho seguransa sivíl hodi halo patrullamentu iha tasi-laran, hodi kontrola peskadór sira sees hosi risku.

“Seguransa tasi ne’e perigu tebes. Ema barak mai ho ró ki’ik oan, dala-ruma iha tasi-klaran mak derrepente anin boot, udan boot, ne’e ita nia seguru tasi ne’e laiha ema ida mak halo patrulla katak, ema ne’e mai hosi Ataúro ou mai hosi ne’ebé. Tanba ne’e presija duni iha fasilidade atu halo patrullamentu,” Mariano “Assanami” Sabino, fó-hanoin.

Dotasaun inisiál hosi proposta OJE tinan 2022 ba PNTL ho montante $34.082.481, ba kategoria Saláriu no Vensimentu $17.709.509, Bens no Servisu $14.712.472, Transferénsia Públika zero, Kapitál Menór $1.660.500, Kapitál Dezenvolvimentu zero.

Orsamentu hirak-ne’e finansia ba programa Seguransa Nasional $31.314.741, Boa Governasaun no Jestaun Institusionál $2.750.990, Igualidade Jéneru no Inkluzaun Sosiál $16.750.

Propósta hosi proponente sira iha diskusaun espesialidade ba PNTL iha proposta hahú hosi númeru 90 to’o 100, ne’ebé hamutuk 10.

Durante votasaun proposta 90 to’o 96, pasa ho votus afavór 51, kontra 0, abstensaun 12 no proposta 97 to’o 100, pasa ho votus afavór 52, kontra 0, abstensaun 11.

Nune’e, proposta hamutuk 10 hosi deputadu proponente sira ba orsamentu PNTL pasa, hodi aumenta tán osan adisionál ba programa sanulu tán ne’ebé proponente sira propoin ho nia orsamentu rasik.

Maibe, soma hamutuk orsamentu hosi dotasaun inisiál inklui orsamentu sira iha proposta adisionál hamutuk 10 nia detallu sira sei anúnsia iha aprovasaun finál globál.

Jornalista: Rogério Pereira Cárceres