Hatutan.com, (15 Dezembru 2021), Díli—Ahu-kdesan ka Sinza hosi Matebian Max Stahl to’o iha Aeroportu Internasionál Prezidente Nicolau Lobato ho Aviaun Qantas hosi Austrália iha tuku 11:30 otl no simu direta hosi Líder nasionál Kay Rala Xanana Gusmão ho José Manuel Ramos Horta.

Jornalista Timoroan sira ho panfletu hein hodi simu sinza Max Stahl nian. Foto/Hatutan.com.

Hafoin simu Sinza ne’e hosi família Max Stahl, líder nasionál na’in-rua entrega direta ba Governu ne’ebé reprezenta hosi Ministru Prezidénsia Konsellu Ministru (MPKM), Fidelis Leite Magalhães.

Notísia iha Relasaun:Komisaun Organizadora ‘Hakarak’ Xanana-Horta mak Simu Direta Sinza Max Stahl

Serimónia simu sinza ne’e, hahú ho lia-dadolin hosi lia-na’in sira, iha mós dansa kultura Timor nian, no akompaña mós ho parada militár hosi FALINTIL Forsa Defeza Timor Leste (F-FDTL).

“Hodi Governu nia naran hato’o bem vindo ba Max Stahl ho nia família. Lori mós Governu nia naran hato’o obrigadu ba maun boot na’in-rua hanesan Kay Rala Xanana Gusmão ho José Manuel Ramos Horta ne’ebé simu ona sinza Max Stahl nian,” Fidelis Leite Magalhães, hateten iha serimónia entrega iha Aeroportu Comoro.

Fidelis mós subliña katak, ema hotu ne’ebé mak iha ne’e, espresa apresiasaun boot ba Max nia serbisu ne’ebé nia halo ba Timor-Leste (TL), iha luta ba ukun rasik an.

“Ita hotu sei la’o tuir prosesu ne’ebé iha, ita sei akompaña to’o haloot iha fatin ikus nian iha Semitériu Santa Krúz Dili,” nia hateten.

Remata serimónia simu, Líder nasionál José Manuel Ramos Horta mak tula sinza Max Stahl halo konvoi tuir ajenda ne’ebé ne’ebé prepara hosi Komisaun Organizadora ba to’o Centro Audiovizual Max Stahl.

Jornalista: Carmelita Isaac