Hatutan.com, (23 Dezembru 2021) Dili– Tribunál Distritál Díli (TDD), Kinta (23/12/2021), liu husi leitura sentensa ne’ebé lee sai husi Juiz prezide Alvaro Maria Freitas,  deside no aplika pena prizaun tinan-tolu (3) no suspende tinan-tolu ba eis Xefe Gabinete Ministériu Finansa (MF), arguida Balbina Soares no kustu judisiáriu $50.00 ba krime pekulatu no administrasaun danoza.

Notísia iha Relasaun: MP Alega Eis Xefe Gabinete MF ho Pena Prizaun Tinan Tolu

Edífisiu Ministériu Finansa, Aitarak Laran, Díli. Foto/Média MF

Tribunál mós absolve funsionáriu tezoureiru MF arguido Zelio Almeida de Sousa, husi krime pekulatu no administrasaun danoza.

Razaun Tribunál aplika sentensa pena suspensaun ba arguida, tanba konsidera faktu provadu bazeia ba deklarasaun arguida katak arguida uza nia kompeténsia hodi halo pedidu efetivu ba Diretór Finansa hodi hasai osan Estadu ba uzu interese partikulár hodi ba ferias iha Bali, maske arguida devolve ona $17.000-liu.

Tribunál deside absolve arguido Zelio Almeida de Sousa ho razaun  tanba durante julgamentu Tribunál la hetan prova ne’ebé bele lori arguido ba simu pena, tanba arguido hala’o servisu bazeia ba orientasaun husi superiór, nune’e mós bainhira arguida halo pedidu husu osan $7.000 ba arguido, arguido foti fó ba.

Relasiona ho desizaun ne’e, Tribunál esplika ba arguida katak arguida la presiza ba tama prizaun, maibé arguido kumpre pena suspensaun tinan-tolu (3) iha li’ur ho kondisaun ida, katak durante tinan-tolu nia laran arguida labele komete tan kualkér krime, bainhira komete maka arguida tenke ba hatán tinan-tolu  iha prizaun.

Ba arguido Tribunál husu atu kuidadu no verifika dokumentu molok hasai osan ba kualkér ema iha Diresaun laran.

Tuir akuzasaun hosi MP katak, arguida hanesan funsionáriu públiku no xefe Gabinete iha MF no arguidu hanesan tékniku Profisionál no Tezoureiru iha MF, maibé iha loron 06 fulan-Jullu 2018, Ministru Negósiu Estranjeiru no Kooperasaun Dionísio Babo Soares haruka pedidu estraordináriu ida ho empréstimu $5.000 konsidera hanesan enviadu estraordináriu Prezidente Repúblika nian ba iha Cabo Verde.

Iha loron 31 fulan-Agusto 2018, ofisiál finansa prepara dokumentu ho montante $195.000 halo adiantamentu hodi responde ba situasaun urjente ne’e.

Iha loron 10 fulan-Setembru 2018, Gabinete Ministériu Negósiu Estranjeiru, devolve hikas osan empréstimu ho montante $5.000 ba arguida, maibé osan refere arguida la tau ba kofre Estadu no utiliza ba nia interese partikulár durante férias ho família iha Bali, Indonézia.

Iha loron 11 fulan-Setembru 2018, arguidu hala’o knaar hanesan tezoureiru iha Banku Sentrál Timor Leste foti osan adiantamentu hosi MF ho montante $195.000 hodi tau iha kofre no save arguidu maka kaer.

Iha 2018, arguida uza nia kargu hanesan Xefe Gabinete hato’o verbalmente pedidu empréstimu osan adiantamentu lori naran Primeiru-Ministru (PM) ho montante $6.000, Ministru Negósiu Estranjeiru no Kooperasaun ho montante $3.000, Gabinete Ministra  Finansa ho montante $1.000 no osan ho montante $711 viajen ba Singapura, maibé realidade hatudu naran ne’ebé mensiona la husu empréstimu ba osan adiantamentu MF.

Ho hahalok arguidu no arguida fó prejuizu ba Estadu ho montante $27.202, tanba ne’e MP akuza arguida ho arguidu ba prátika krime pekulatu no administrasaun danoza ne’ebé previstu iha artigu 295 ho artigu 274 hosi kódigu penál Timor-Leste.

Audiénsia julgamentu prezide hosi juíz koletivu, José Gonçalves, Argentino Nunes, Alvaro Maria Freitas, MP reprezenta hosi Prokuradór Adérito Tilman no arguidu hetan asisténsia legál hosi Defensór Públiku Nelson Borges.

Jornalista: Carmelita Isaac