Hatutan.com, (21 Janeiru 2022), Díli—Polísia Nasionál Timor-Leste (PNTL), liuhosi Komandu Munisípiu Díli (KMD), kontinua hala’o prosesu ba sidadadaun mane na’in-lima nu’udár autór prinsipál ba konfrontu iha Salaun Mahoka, iha Sábadu 15 Janeiru iha área Osindu, Suku Bairru Pité, Postu Administrativu Dom Aleixo, Munsípiu Díli.

Komandante PNTL Munisípiu Díli, Superintendente Xefe Polísia, Hendrique da Costa. Foto/PNTL.

Iha akontesimentu ne’e, Komandu PNTL Díli, liuhosi Eskuadra Dom Aleixo hamutuk ho Forsa Rezerva, halo kedan atuasaun no konsege kaptura suspeitu hamutuk na’in-sia (9), hodi halo identifikasaun iha Eskudra Dom Aleixo.

Notisia iha Relasaun:PNTL Detein Autór Na’in-Ualu hosi Insidente Salaun Mahoka

Rezultadu identifikasaun, iha suspeitu na’in-lima (5) mak PNTL halo partisipasaun ba sira no na’in-haat (4) seluk, Polísia liberta totál.

“Depois halo indentifikasaun, sira seluk ita liberta tiha no agora identifika loos suspeitu na’in-lima mak ita nia parte investigasaun, halo ona partisipasaun,” Komandante PNTL Munisípiu Díli, Superintendente Xefe Polísia, Henrique da Costa hateten iha Komandu Jerál Caicoli, Sesta (21/01/2022).

Oras-ne’e, ekipa investigasaun Eskuadra Dom Aleixo nian, kontinua hela prosesu ne’e ho rejista NUC (Número Criminál) 0029/2022/16 Janeiru.

“Ida ne’e mak agora daudaun prosesu la’o hela,” Superintendente Xefe Polísia, Henrique da Costa, subliña tán.

Komandu PNTL Lahatene Involvimentu Membru

Iha akontesimentu ne’e, mosu mós informasaun balun katak, deskonfia membru PNTL balun hosi Munisipiu Díli nian involve iha kazu konfrontu ne’e.

Superintendente Xefe Polísia, Hendrique da Costa seidauk simu informasaun ka keixa ruma hosi komunidade kona-bá ninia membru envolve iha insidente ne’e.

Komandante ne’e husu ba komunidade katak, bainhira haree hetan membru PNTL balun mak envolve iha kazu ruma, ka halo agresaun fízika hasoru sidadaun ruma, bele hato’o keixa ba investigadór sira hodi prosesa tuir lei no Regulamentu Dixiplinár PNTL. 

Jornalista: Rogério Pereira Cárceres