Hatutan.com, (22 Janeiru 2022), Dili-Arguidu ho inisiál ACP ne’ebé deskonfia “oho” nia fen iha Kampung Tuti, Bebonuk, Díli, foin lalais ne’e, kumpre ona prizaun preventiva  iha Prizaun Becora, Dili.

Notísia iha Relasaun: PNTL Submete ona Kazu Omesídiu Kampung Tuti ba Ministériu Públiku

Ilustasaun iha Prizaun Laran. Foto/Google

Liuhusi desizaun primeira interrogatóriu iha Tribunál Distritál Dili (TDD), iha loron Sesta, 21 fulan-ne’e, juiz singular José Gonçalves, deside aplika medida koasaun prizaun preventiva ba arguidu tanba oho nia kaben Esperança Dias de Brito iha kuarta madrugada (19/01/2022), iha sira-nia hela fatin Kampung Tuti, Bebonuk-Dili.

Razaun Tribunál aplika medida koasaun ne’e, tanba iha indísiu forte arguidu involve iha krime omisídiu agravadu maske iha prosesu primeiru interrogatóriu ne’e arguidu hili nia direitu nonook.

Parte Defeza ne’ebé fó asisténsia legal ba arguidu sei ko’alia fali ho arguidu durante loron 15 atu hatama rekursu ka lae.

“Depois  desizaun, ha’u konfirma ho arguidu, maibé nia dehan sei hanoin lai, entaun parte defeza labele halo buat ida tanba desizaun atu halo rekursu ka  lae depende mós ba arguidu nia hakarak, tanba iha julgamentu arguidu uza nia direitu nonook signifika nia involve ka lae, ita seidauk hatene,” Defensor Públiku Eustáquio Guterres ne’ebé fó asisténsia legal ba arguidu hateten ba Hatutan.com via telefónika, Sábadu (22/01/2022).

Iha primeiru interrogatóriu ne’e, Ministériu Públiku ne’ebé reprezenta husi Prokuradór Hipolito Santa, promove arguidu ba krime omisídiu agravadu ne’ebé previstu iha artigu 139 husi kódigu penal Timor Leste.

Iha Kuarta madrugada (19/01/2022), Servisu Investigasaun Kriminál (SIK) simu informasaun no to’o kedas iha fatin akontesimentu hodi kaptura no halo detensaun durante horas 72 hafoin ba arguidu hafoin submete ba primeiru interrogatóriu tanba deskonfia oho nia fen kaben.

Primeiru interrogatóriu ne’e prezide husi juiz singular José Gonçalves, Ministériu Públiku reprezenta husi Prokuradór Hipolito Santa no arguidu hetan asisténsia legal husi Defensor Públiku Eustáquio Guterres.

Jornalista: Carmelita Isaac