Hatutan.com (16 Fevereiru 2022), Díli—Tribunál Rekursu (TR) liu hosi Câmara de Contas, iha tinan ne’e hahú halo auditoria foun ba fundu Covid-19, subsídiu ne’ebé hetan hosi parseiru ba Cesta Bázika.

Abitante sira foti sasán Cesta Bázika. Foto/Kontribui hosi Dasiparu.

Alende ne’e kontinua auditóriu ne’ebé halo ona iha tinan kotuk no seidauk finaliza mak hanesan auditoria ba Ministériu Administratasaun Estatál, Ministériu Obras Públika (MOP) liu-liu estrada ne’ebé hetan emprestimu hosi Banku Dezenvolvimentu Aziátiku  (ADB), auditoria ba Parlamentu Nasionál, ZEEMS ne’ebé daudaun ne’e la’o hela.

Notisia iha Relasaun:TR Lansa Formuláriu Online ba Deklarasaun Riku-soin

“Ha’u la lembra númeru fiksu hosi auditoria ne’ebé Câmara de Contas halo ona, maibé iha tinan kotuk iha auditoria 10-resin no aprova ona ne’en ka hitu. Hirak ne’ebé la aprova ba tinan ne’e no aumenta tán auditoriu foun tolu kompostu hosi fundu Covid-19, subsídiu ne’ebé mai hosi parseiru bilaterál ba Cesta Bázika ne’e foun,” Prezedente TR, Deolindo dos Santos hateten ba jornalista sira hafoin lansamentu formuláriu deklarasaun ba rendimentu bens no interese, iha edifísiu TR Caicoli, Kuarta (16/02/22).

Hosi númeru auditoria ne’ebé Câmara de Contas halo, iha rua ka tolu mak atu aprova iha tempu badak no sei publika iha Website TR, nune’e ema hotu-hotu bele asesu, maibé hirak ne’ebé seidauk, nia parte seidauk bele pronunsia.

Problema ne’ebé durante ne’e Câmara de Contas hasoru maka, durante Câmara de Contas aprova relatóriu lubuk ida no publika liu hosi website, maibé ema barak laiha interese atu haree no lee konteúdu no desizaun iha relatóriu ne’e no barak mak ko’alia de’it maibé seidauk kompriende didi’ak konteúdu hosi rezultadu auditóriu ne’e.

Tanba ne’e, nia parte husu ba entidade hotu-hotu atu kompriende didi’ak konteúdu hosi rezultadu auditóriu, tanba bainhira Câmara de Contas ko’alia, signifika la sees hosi rezultadu ne’ebé prodús.

Jornalista: Carmelita Isaac