Hatutan.com, (23 Fevereiru 2022), Díli- Membru Parlamentu Nasionál (PN) preokupa ho polítika VIII Governu nian ne’ebé legaliza jogu tradisionál bola guling ho durasaun tempu naruk tamba de’it atu hatama reseita ba Estadu, maibé la sukat nia impaktu sosiál no ekonomia ba komunidade nia moris.

Notísia iha Relasaun: Loke Jogu Bola Guling, Governu La Eduka Povu

Jogu Bola guling. Foto/Foti husi Facebook

Membru PN husi Bankada CNRT, Maria Barreto hateten, jogu bola guling la’ós ba halimar gratuita, maibé uza osan mak joga no liga ho situasaun real Timor-Leste iha hela situasaun ekonomia difisil, rendimentu família mínimu no faktu hatudu nesesidade família as, maibé rendimentu ki’ik no situasaun ida ne’e afeta mós ba família nia moris nian.

“Bola guling bele mós hamosu kazu violénsia doméstika, violasaun seksuál no afeta direita mós ba futuru jerasaun Timor-Leste tamba kuaze labarik sira kalan-kalan ba halimar mós bola guling.” Maria Barreto hateten.

Bainhira Governu la kria regra hodi asegura partisipasaun labarik sira nian iha jogu bola guling, sei lori efeitu negativu ba edukasaun iha Timor-Leste tamba labarik barak kontinua partisipa ativu iha jogu bola guling ne’ebé governu legaliza hodi haluha mós sira nia devér nudár sidadaun liuliu hanesan estudante.

Tuir nia observasaun Deputada ne’e nian katak iha fatin bola guling sira ne’ebé loke iha kada suku iha Dili laran sempre envolve  labarik sira no labarik sira livre asesu ba fatin jogu bola guling tamba Governu la tau regra no inan-aman sira kontinua husik oan sira livre nune’e.

Notísia iha Relasaun: Governu Autoriza Loke Jogu Bola Guling Iha Dili Laran

 “Governu hetan reseita husi bola guling, maibé haree ba parte edukasaun, ita hakiduk pasu ida ba kotuk, se husik de’it nune’e tamba reseita ba Estadu ita sei sakrifika labarik lubuk ida-nia futuru,” Deputada Maria Barreto hateten.

Deputada ne’e husu atu Governu hola inisiativa hodi taka ona jogu bola guling iha fatin públiku sira-ne’e atu bele kontribui ba prevensaun violénsia doméstika no prevene labarik sira abandona sira nia responsabilidade iha uma no aula eskola.

Membru PN husi Bankada PUDD, António de Sá Benevides, hateten Governu fó legalizasaun ba operadór jogu bola guling ho intensaun atu hatama reseita ba Estadu, maibé komunidade sira tenke iha auto domíniu ba nia an hodi kontrola no jere nia ekonomia família nian no ida-ne’e konsidera nudár dezafiu boot iha moris uma kain nian.

Nia dehan, labarik barak mós ba asiste no partisipa iha jogu bola guling, tamba ne’e Governu tenke konsidera ida-ne’e, la bele hanoin de’it osan ba kofre Estadu, tama maibé hanoin mós labarik sira nia futuru.

“Governu tenke kria regulamentu ida ho rigór atu asegura labarik sira nia partisipasaun iha atividade iha jogu ne’e,” António de Sa Benevides.

Deputadu ne’e hatutan, la iha inan ka aman ka ema ruma obriga labarik sira ba joga bola guling maibé tamba jogu ne’e livre no nakloke ikus mai labarik sira mós hola parte asiste jogu ne’e. basá Governu la iha seriedade atu kontrolu jogu sira-ne’e no interese liu ba reseita.

 Iha parte seluk membru PN husi Bankada FRETILIN, David Dias Ximenes “Mandate” hateten jogu bola iha nia efeitu negativu no pozitivu, tamba ne’e so governu mak bele sukat no tetu hodi iha desizaun ida serteza ba nasaun ne’e nia futuru.

“Atu dehan negative mós ha’u la ko’alia, atu dehan pozitivu mós ha’u la ko’alia,” David Dias Ximenes hateten.

Jornalista: Vito Salvadór