Hatutan.com, (01 Marsu 2022), Díli—Sekretáriu Estadu Komunikasaun Sosiál (SECOMS), Mericio Juvinal dos Reis Akara husu jornalista atu promove Jornalizmu ba Dame durante kampaña eleitorál ba eleisaun Prezidensiál 2022.

Jornalista Timoroan sira foto hamutuk ho Sekretáriu Estadu Komunikasaun Sosiál (SECOMS), Mericio Juvinal dos Reis Akara hafoin serimónia brefing média ba kobertura eleisaun Prezidensiál 2022, Tersa (01/034/2022). Foto/Hatutan.com.

“Jornalista sira tenke halo reportajen ida edukativu hodi promove pás no unidade nasionál,” Mericio Juvinal dos Reis Akara hateten ba jornalista sira iha salaun PCM Palasiu Governu, Tersa (01/03/2022).

Notisia iha Relasaun:Kandidatu Sira “Jura” La Hatún-malu iha Kampaña

Jornalista sira tenke kaer metin prinsípiu liberdade imprensa no liberdade espresaun hodi halo notísia ida mais sivilizadu no respeita ba kode étika jornalista, la submete ba influensia polítika ne’ebé harahun integridade redasaun média ida nian.

Jornalista labele promove hoax hodi hamosu dezakreditasaun no hamihis konfiansa públiku ba figura ida hodi diskriminaliza figura seluk ba interese pessoál no grupu ida nian.

“Hasa’e ita nia knaar ida Peace Journalism ho reportajem ida ne’ebé kredível, sai fontes ba lia loos no halo balansu bazeia ba kódigu étika,” nia hateten.

Governante ne’e husu atu kada instituisaun média, konsellu redasaun mak tenke orienta no komanda servisu hotu-hotu redasaun nian no hadook redasaun hosi interese polítika hodi asegura katak liberdade imprensa no liberdade espresaun funsiona atu garante ema hotu-hotu asesu ba informasaun ho loos no kredível.

Prezidente Interinu Konsellu Imprensa, Expedito Dias Ximenes. Foto/Hatutan.com.

Prezidente Interinu Konsellu Imprensa, Expedito Dias Ximenes hateten iha ámbitu kampaña eleisaun Prezidensiál, jornalista sira iha liberdade atu halo kobertura maibé tenke iha responsabilidade tuir kódigu étika haruka hodi la halis ba parte ida.

“Média pilár importante ba dezenvolvimentu nasionál nune’e tenke hakruk de’it ba kódigu étiku hodi garante liberdade espresaun no liberdade imprensa iha sosiedade,” Expedito Dias Ximenes hateten.

Monitorizasaun CI nian atu regula jornalista hodi evita komete infrasaun no viola kódigu étika jornalista, nune’e CI prodúz mós mata-dalan ba reportajen eleitorál jornalista sira nu’udár giaun ida atu servisu ho imparsialidade, balansu no independente.

Alende ne’e, Xefe Redasaun Hatutan.com, Francisco Belo Simões hateten, orientasaun jornalista hotu-hotu ba kobertura iha terrenu mai hosi redasaun ne’ebé nu’udár guardiaun no assume mós responsabilidade jurídiku ba produtu jornalístiku ne’ebé publika iha portál Hatutan.com.

“Jornalista Hatutan.com ba halo kobertura la’ós tanba nia besik ho kandidatu ka fontes, maibé tanba iha orientasaun hosi redasaun tuir prinsípiu kódigu étika jornalista ne’ebé iha,” Francisco Belo Ximões hateten.

Buat importante liu iha Redasaun Hatutan.com maka obedese ba kódigu étika, obedese ba orientasaun Xefe Redadaun no tenke garante nafatin independénsia atu garante liberdade imprensa no liberdade espresaun tuir mata-dalan reportajen eleisaun ne’ebé CI prodúz.

Hatutan.com respeita mós kalendáriu eleitorál ne’ebé órgaun reguladora sira iha, hodi la fó espasu atu polítiku sira uza Hatutan.com nia portál atu halo kampaña nakukun ba sira nia interese no esénsia ka valór notisia ba interese nasionál laiha.

“Bainhira ita halo kampaña nakukun, ne’e hatudu ita fó ita-nia varanda ba ema seluk atu mai fase nia roupa foer. Ida ne’e labele no sei la akontese ba Hatutan.com,” nia hateten.

Hatutan.com iha polítika redasaun rasik no iha meiu rasik atu halo akumulasaun ba kandidatura hotu-hotu durante kampaña eleitorál maski ho rekursu ne’ebé limitadu.

Nune’e mós Xefe Redasaun Rádio Timor Leste, Constancio Viera hateten buat ne’ebé importante liu iha kampaña eleitorál ne’e maka, hanesan jornalista tenke garante nafatin informasaun ida ne’ebé loos no kredível ba públiku liu hosi reportajen ida balansu no independente.

Jornalista: Vito Salvadór