Hatutan.com, (04 Marsu 2022), Díli—Komisáriu Comissão Anti-Corrupção (CAC) Sérgio Hornai husu ba universitáriu foun Universidade da Paz (UNPAZ) atu estuda makaas no hatudu disiplina, kontribui fó opiniaun krítiku iha luta kolektiva prevene no kombate korrupsaun iha rai doben Timor-Leste (TL).

Orientasaun akadémika UNPAZ nian tinan 2021-2022, Sesta (04/03). Foto/CAC.

Komisáriu Sérgio Hornai hato’o lia hirak ne’e bainhira sai oradór iha orientasaun akadémika UNPAZ nian tinan 2021-2022, Sesta (04/03).

Notisia iha Relasaun:CAC Ofisialmente Utiliza Sistema Plataforma Online bá Deklarasaun Riku-soin

“Kontribuisaun ne’ebé universitariu sira tenke halo maka estuda no tenke fó opiniaun krítiku hodi muda mentalidade sosiedade nian ne’ebé sei fó prioridade ba interese privadu hodi privatiza rikusoin hotu Estadu nian,” nia hateten.

Tuir perspetiva CAC, bainhira otas-foun sira ne’ebé hala’o estudu iha UNPAZ estuda didi’ak, no estuda makaas sei loke universitáriu sira nia orizonte no koñesimentu ida luan ba prevene no kombate korrupsaun hodi dignifika povu no Estadu Timor-Leste iha sosiedade mundiál.

Komisáriu Sérgio Hornai sai oradór iha orientasaun akadémika UNPAZ nian tinan 2021-2022, Sesta (04/03). Foto/CAC.

“Ita boot sira tenke estuda makaas, berani atu ko’alia no halo kritika barak liu hosi ita boot sira nia universidade, liu hosi semináriu sira no tenke fó opiniaun barak liu hosi média kona-bá hahalok korrupsaun nian iha Timor-Leste,” Komisáriu Sérgio enkoraza.

Alende ne’e, universitariu sira mós tenke kreativu, inovativu no sivilizadu. Universitáriu sira tenke mai ho baze étika ne’ebé forte no baze siénsia ne’ebé krítiku no libertadu, nune’e kontribui idea ba Estadu bele halo esforsu hotu hodi hametin sistema judisiál ida di’ak, nune’e kontribui ba prevene no kombate korrupsaun.

Iha 02 Marsu, Reitór UNPAZ Adolmando Soares Amaral ofisialmente halo abertura ba orientasaun estudante foun tinan akademiku 2022 ho totál estudante, rihun rua atus haat (2.400).

Perante estudante sira, Reitór ne’e deklara katak, UNPAZ kontinua prepara rekursu umanu hodi kontribui ba dezenvolvimentu TL.

“Ho Reforma no Kualidade, UNPAZ prontu prepara rekursu umanu hodi kontribui ba dezenvolvimentu Timor-Leste,” nia hateten.

Tinan ne’e, UNPAZ simu estudante foun hamutuk 3.000 kompostu hosi kampuz sentr’al Díli hamutuk 2.400, RAEOA 200-resin no Covalima 100-resin.

Jornalista: Carmelita Isaac