Hatutan.com, (16 Marsu 2022), Díli—Kandidatu independente Prezidente Repúblika 2022-2027 ho númeru sorteiu 8, Jenerál Reformadu Tito da Costa ‘Lere Anan Timur’ promete katak, bainhira eleitu sei ukun ho politika estabilidade nasionál.

Jenerál Reformadu Tito da Costa ‘Lere Anan Timur’. Foto/Hatutan.com.

Promesa ne’e bazeia ba esperiénsia durante tinan 20-resin lidera instituisaun FALINTIL Forsa Defeza Timor Leste (F-FDTL) ho situasaun ne’ebé hakmatek hahú hosi loro-monu to’o lorosa’e.

Notisia iha Relasaun:Kampaña Ikus, Armanda Berta Agradese Ba Apoiante KHUNTO

Maski iha situasaun politika ne’ebé la hakmatek hahú hosi eleisaun antisipada to’o impase polítika.

Tanba ne’e, nia hakarak kandidata an ba PR hodi garante estabilidade iha rai-laran, tanba estabilidade la’ós iha de’it militár nia laran maibé iha nível polítiku sira.

“Ha’u brani kandidata an ba PR tanba hetan konsellu hosi veteranu, rezisténsia, ofisiais forsa armada, tanba tinan 20-resin kaer forsa armada ho situasaun ne’ebé hakmatek. Maski situasaun polítika la hakmatek, tanba ne’e ha’u kandidata an atu ukun rai ida-ne’e ho estabilidade nasionál no tu’ur hamutuk, unidade no rekonsiliasaun,” Lere Anan Timur ninia kompromisiu politika, iha kampaña ba dala ikus ne’ebé hala’o iha kampu Futeból Parokia Maria Auxiliadora, Comoro, Kuarta (16/03/2022).

Jenerál Reformadu Tito da Costa ‘Lere Anan Timur’. Foto/Hatutan.com.

Bainhira eleitu Lere hakarak rezolve problema hotu ho diálogu hodi garante estabilidade, pás hodi kontribui ba dezenvolvimentu nasionál.

Razaun fundamentu hosi Lere nia kandidatura ba Prezidente Repúblika 2022-2027, marka diferénsa ho kandidatu sira hodi tau responsabilidade morál atu liberta povu ba moris tuir prinsípiu demokrasia. Nia mós agradese ba ekipa tomak liu-liu militante no apoiante sira ba konfiansa

Kampaña ba dala ikus hosi kandidatu ho númeru sorteiu 8 ne’e, hetan partisipasaun másimu hosi apoiantes no seguransa másimu hosi PNTL inklui observadór nasionál no internasionál.

Jornalista: Carmelita Isaac