Hatutan.com, (25 Marsu 2022), Díli—Comissăo Nacional de Eleições (CNE), iha Sesta 25 Marsu, tuku 14:00, konklui apuramentu nasionál ba votu nulu no reklamadu sira, ne’ebé rejista hosi sentru votasaun hotu iha territóriu nasionál.

Populasaun Suku Maubisse Vila forma ba vota iha eleisaun prezidensiál, 19 Marsu 2022. Foto/Hatutan.com

Prezidente CNE, José Agostinho da Costa Belo haktuir, depois de eleisaun iha 19 Marsu, kontajen halo kedan iha sentru votasaun, halo apuramentu iha nível munisípiu no rezultadu tomak tuir lei tenke lori mai iha CNE Nasionál hodi halo apuramentu nasionál.

Notisia iha Relasaun:CNE Konklui Apuramentu Votu Nulu no Reklamadu Hosi Aileu-Ainaro

Matéria ne’ebé importante atu halo iha apuramentu nasionál maka,  votu reklamadu ho nulu ne’ebé iha, hato’o mai CNE liuhosi plenária no komisáriu sira hamutuk ho tékniku sira hodi halo apuramentu nasionál.

Durante Apuramentu iha CNE nasionál, hosi votu sira ne’ebé nulu, depois halo verifikasaun ho intensivu, verifika ho di’ak, no rezultadu CNE hato’o mós ba iha fiskál sira partidu no kandidatu PR na’in-16 nian, kona-bá ida-idak nia votu ne’ebé sira merese.

Iha konfirmasaun ne’e hatudu katak, iha duni votu válidu balun ba kandidatu sira hosi sorteiu 1 to’o 16.

Alende ne’e, iha mós votu reklamadu sira hafoin CNE haree, balun mantein nafatin reklamadu no balun sai mós válidu.

“Tanba ne’e mak prosesu tomak ita hala’o tiha ona, oras 72 ne’ebé lei fó, ita kumpri no ohin ita termina ona. Tanba ne’e mak hato’o ba públiku katak ohin 25 Marsu ita termina apuramentu nasionál, no tuir lei sei iha oras 72 oras ba CNE nia komisáriu sira, hamutuk ho tékniku sira, elabora akta finál atu bele taka sai iha edifísiu CNE,” José Agostinho da Costa Belo hateten ba jornalista sira iha Sala Konferénsia Imprénsa CNE, Caicoli, Dili, Sesta (25/03/2022).

Bainhira akta sira ne’e CNE ne’e konklui ona, sei taka iha edifísiu CNE nian hodi bele fó mós tempu ba interesante sira, liu-liu parte ekipa sira fiskais partidu poltiku ka kandidatu sira na’in-16, karik halo reklamasaun ruma kona-bá prosesu tomak ne’ebé la’o, sira iha dalan atu hato’o mos reklamasaun.

Bainhira la akontese reklamasaun ruma, CNE sei submete ofisialmente ba Tribunál de Rekursu, ba rezultadu ne’ebé iha.

Rezultadu Apuramentu Nasionál ne’e, inklui de’it sentru votasaun sira iha territóriu nasionál ho Austrália. Koan-bá Portugál, Korea, Inglaterra ho Irlándia seidauk halo apuramentu tanba tempu legál ne’e ultrapasa tiha ona.

“Sasán sira ne’e, seidauk mai to’o iha Timor, ne’ebé tempu legál liu ona, ami halo to’o de’it iha ne’e. Ne’ebé, karik rezultadu sira ne’e fó mai, rezultadu ne’ebé sei sai, ami apura de’it rezultadu sentru votasaun no akta orijinál sira ne’ebé lori mai, ida ne’e mak sei halo, ne’e para públiku bele komprende no hatene ida ne’e no prosesu sira tuir mai,” nia hateten.

Hatán kona-bá durante halo Apuramentu Nasionál ne’e, totál votu nulu ho Reklamadu hira mak sai fali Válidu, José Belo hateten, prosesu hotu ne’ebé sira halo la’o ho transparante, no númeru votu hira mak sai fali válidu, sira rejistadu.

Númeru ne’e CNE labele fó sai lai tanba sira sei elabora akta ho durasaun tempu oras 72 tán. Hafoin termina, CNE sei halo konferénsia imprénsa ikus liu, hosi rezultadu ne’ebé kompletu.

CNE mós sei hala’o plenária, entre komisáriu sira hodi aprova kona-bá rezultadu Apuramentu Nasionál ne’ebé sira halo.

Depois plenária ne’e sei fó sai totál votu nulu no reklmadu hira mak sai fali votu álidu, hodi atribui ka aumenta tán ba kada kandidatu.

Segunda Volta Hein Desizaun TR

Tuir kalendáriu eleisaun prezidensiál ne’ebé antes ne’e STAE fó sai katak, eleisaun ba segunda volta sei akontese iha 19 Abríl 2022, maibé iha 02 to’o 16 Abríl antes, kandidatu PR sira  ne’ebé atu hakat ba eleisaun segunda volta, sei halo uluk kampaña eleitorál.

CNE adianta katak, tempu ba kalendáriu tuir mai depende mós rezultadu validasaun hosi Tribunál Rekursu (TR). Bainhira mak fó sai rezultadu, maka iha tempu ne’ebá kedan CNE tenke aprova mós buletin de votu ne’ebé mak aprezenta.

Nune’e, sura hosi data ne’ebé TR anunsia tuir kalkulasaun ne’e, eleisaun bele akontese iha 18 Abril, no bele mós 19 Abril.

Tanba ne’e, CNE hamutuk ho STAE mós sei estuda hela, posibilidade haree mós ba lei, kestaun legál ne’ebé mak iha ona.

“Tanba ne’e, ita labele dehan 19, sé Tribunál fó sai rezultadu validasaun ne’e sá data. Antes liu, ita bele sura mós dia 01 Abríl bele kampaña. Ne’ebé, ita seidauk hatene maibé rezultadu ita hein took, sé ba Segunda Volta ka, la’e. Depende rezultadu ne’ebé sai,” José Belo subliña.

Jornalista: Rogério Pereira Cárceres