Hatutan.com, (29 Marsu 2022), Díli—Udan boot ne’ebé akontese iha tuku 17:00 Oras Timor Leste, hamosu inundasaun, bee boot iha drinajen Manleuana hamout labarik ida ho idade tinan 10, inklui mota Comoro parte Kasnafar hakoi karreta Hi Lux ida no mós L300 ida.

Komunidade hamutuk ho pesoál bombeiru sira buka tuir labarik ne’ebé mout iha drinajen iha área Manleuana, Tersa (29/03/2022). Foto/Facebook.

Hafoin labarik ne’e mout liu minutu balun, komunidade iha área nee kontaktu kedan ho parte protesaun sivíl ne’ebé dezloka kedan pesoál bombeiru sira to’o fatin akontesimentu hodi buka-tuir labarik ne’ebé mout iha drinajen.

Notisia iha Relasaun:Inundasaun 4 Abríl, Governu “Taka” Relatóriu Apoiu Umanitáriu

Iha fatin akontesimentu, komunidade ho naran Lucas Martins konta-tuir katak, nia haree hosi uma andar leten labrik ne’e monu tuun ba valeta no bee ne’ebé ho volume boot rasta labarik ne’e to’o lakon.

“Ha’u tuur iha uma andar leten ne’ebá hateke tuun ba labrik barak mak halimar udan been iha Estrada laran. Hakfodak viziñu sira hakilar, ha’u mós halai tún bá, labarik bee lori tiha ona,” Lucas haktuir ba Hatutan.com iha fatin akontesimentu.

Mota Kasnafar hakoi karreta L300 ida, Tersa (29/03/2022). Foto/Facebook.

Oras ne’e daudaun parte bombeiru sira kontinua buka tuir labarik ne’e maibé seidauk hetan no tuir observasaun Hatutan.com katak, desde hahú udan iha tuku 17:00 labarik ho idade tinan 10 mai karaik inklui ema boot balun iha Dili laran hariis udan been iha Estrada públiku to’o iha área balun hamosu engrafamentu.

Kona-bá karreta rua ne’ebé mout iha mota Kasnafar Manleuana nian, oras ne’e sei metin hela iha mota laran no mota hakoi daudaun ona, tanba volume bee mota kontinua aumenta kauza hosi udan boot iha parte Aileu.

Mota Kasnafar hakoi karreta Hi Lux ida, Tersa (29/03/2022). Foto/Facebook.

Udan boot durante oras ida resin ne’e, rezulta bee tama komunidade nia uma kuaze iha Dili laran liuliu áre sira ne’ebé risku ba inundasaun.

Fo hanoin mós katak, 04 Abríl tinan 2021, akontese udan boot durante kalan tomak hamosu inundasaun iha fatin barak, liuliu iha Dili laran, uma barak hetan estragus, hamate ema, no ema barak refujia to’o ohin loron.

Jornalista: Rogerio Pereira Carceres