Hatutan.com, (01 Abríl 2022), Díli—Partidu Demokrátiku (PD) deside hodi fó apoiu ba kandidatu Prezidente Repúblika ho númeru sorteiu 1, José Manuel Ramos Horta iha eleisaun segunda volta tanba iha razaun haat ne’ebé deside ona iha reuniaun kuadru partidu iha sede nasionál Colmera, 31 Marsu 2022.

Prezidente PD, Mariano Assanami Sabino kumprimenta José Manuel Ramos Horta iha Ró laran bainhira atu dezloka ba RAEOA, Sesta (01/04/2022). Foto/Eugénio Pereira.

Razaun haat ne’ebé Konsellu Ezekutivu PD deklara mak hanesan, Primeiru Konsidera vontade no preferénsia polítika ne’ebé espressa hosi kuadru partidu nian iha reuniaun 31 Marsu iha sede nasionál.

Notisia iha Relasaun:KHUNTO Apoia Lú Olo Bazeia ba Plataforma Entendimentu Formasaun VIII Governu

Segundu, konsidera rezultadu eleisaun Prezidensiál primeira volta, ne’ebé hala’o iha 19 Marsu 2022 iha ne’ebé kandidatu hosi Partidu Congresso Nacional Reconstrução Timorense (CNRT), José Manuel Ramos Horta mak hetan votus maioria no PD hato’o ninia kongratulasaun.

Terseiru, konsidera konsisténsia no semellansa vizaun polítika kandidatu PD Mariano Assanami Sabino Lopes ho kandidatu CNRT José Manuel Ramos Horta.

Kuartu, konsidera kandidatu CNRT José Manuel Ramos Horta ne’ebé ho kapasidade atu promove diálogu, garantia unidade nasionál no vontade atu repoin órden konstitusionál  no respeita Konstituisaun.

“PD ofisialmente deklara fó apoiu ba kandidatu CNRT José Ramos Horta iha eleisaun Prezidensiál 2022 segunda volta, ne’ebé sei hala’o iha 19 Abril,” Sekretáriu Jerál PD, António da Conceição Kalohan, deklara liu hosi konferénsia imprensa ne’ebé hala’o iha sede nasionál Colmera, Sesta (01/04/2022).

Iha fatin hanesan Prezidente PD, Mariano Assanami Sabino reforsa katak, PD deside hodi fó apoiu ba kandidatu José Manuel Ramos Horta tanba iha kompromisu polítika hanesan.

“Tanba ne’e maka kandidatu Horta mós prontu hodi simu PD, entaun ida ne’e mak hanesan kompromissu ba PD hamutuk ho CNRT atu lori Horta ba Prezidente Republika,” Assanmi hateten.

Assanami mós deklara katak, PD fiar ba kapasidade José Ramos Horta nian bainhira eleitu ba Prezidente Repúblika sei promove diálogu no mós iha kapasidade atu respeita konstituisaun ne’ebá vigora iha país ne’e.

Hafoin konferénsia imprensa, iha tuku 09:30 oras Timor Leste, estrutura PD no estrutura PDRT hamutuk ho estrutura CNRT akompaña kandidatu José manuel Ramos Horta dezloka kedan ba Rejiaun Administrativa Espesiál Oecusse Ambeno (RAEOA), hodi hahú kampaña dahuluk iha rai ketan ne’e iha Sábadu, 02 Abríl 2022.

Jornalista: Vito Salvadór