Hatutan.com, (21 Abríl 2022), Díli—Estadu Vatikanu (Santa Sé) liu hosi ninia reprezentante iha Timor-Leste (TL), Mgr Marco Sprizzi,  husu Governu TL atu kontinua implementa akordu konkordata ne’ebé halo ona entre Estadu rua liuliu fó rekoñesimentu ba estatutu jurídiku Igreja Katólika nian iha TL, hanesan Dioseze no Parókia sira.

Reprezentante Santa-Sé iha Timor-Leste, Mgr Marco Sprizzi. Foto/Facebook.

Marco Sprizzi  ko’alia ona asuntu ne’e ho Governu TL liu hosi Ministru Justisa (MJ) Tiago Amaral Sarmento liuliu ko’alia mós kona-bá implementasaun no aplikasaun konkordata entre TL ho Santa Sé, ne’ebé iha artigu 3 hosi konkordata ne’e ko’alia kona-bá instituisaun Igreja Katólika tenki iha personalidade jurídika.

Lee mós:Papa Francisco Simpatia Boot atu Vizita TL iha 2022

“Signifika, iha kapasidade halo tuir aspetu jurídiku ne’ebé la’ós de’it reprezenta ema ida, maibé reprezenta instituisaun Igreja, depois de tinan 7 asina konkordata ne’e seidauk aplika to’o agora, tanba ne’e atu rezolve problema ne’e tenki iha uluk rekoñesimentu hosi Estadu,” nia hateten ba jornalista sira hafoin enkontru iha Gabinete MJ Colmera, Kinta (21/04/2022).

Hatán ba kestaun ne’e, Ministru Justisa (MJ) Tiago Sarmento rekoñese katak iha artigu balun hosi konkordata ne’e seidauk implementa no presiza iha diskusaun, tanba Governu TL iha dever atu fó rekoñesimentu hanesan aktu konstrutivu hodi rekoñese ezisténsia Igreja Katólika bazeia ba akordu ne’ebé selebra ona.

“Artigu balun iha konkordata ne’e presiza halo diskusaun, tanba ezisténsia Igreja la’ós hanesan organizasaun no ezisténsia Kreda Katólika liu-liu Dioseze no Parókia, Estadu iha devér atu fó rekoñesimentu estatutu juridiku bazeia ba akordu konkordata ne’ebé selebra ona,” Tiago Sarmento hateten.

Tanba ne’e, MJ sei prosesa fazeadamente no daudaun sei iha faze dahuluk oinsa atu fó rekoñesimentu juridiku ba ezisténsia Igreja Katólika iha TL liu-liu aktu rekoñesimentu ba ezisténsia Dioseze, Parokia no Relijiozu sira.

Jornalista: Carmelita Isaac