Hatutan.com, (25 Abríl 2022), Díli— Kompañia nasionál Jonize hala’o hela rehabilitasaun ba Estrada kuaze metru 680 hosi parte terminál Tasi-Tolu to’o Raikotu kuaze metru 680.

Primeiru Ministru (PM), Taur Matan Ruak observa rehabilitasaun estrada iha Tasi-Tolu. Foto/Média PM.

Rehabilitasaun ne’e nu’udár parte ida ba serimónia Investidura ba Prezidente Repúblika foun no Komemorasaun Tinan 20 Restaurasaun Indepedénsia Repúblika Demokratika Timor Leste (RDTL), ne’ebé sei realiza iha Tasi-Tolu, no sei marka prezensa hosi alta dignitários sira País amigu nian.

Iha loron 24 fulan Abríl tinan 2022, Primeiru-Ministru (PM) Taur Matan Ruak, akompañadu hosi Ministru Obras Públika (MOP), Abel Pires no Vise-Ministru Obras Públikas, Nicolau Lino Freitas Belo, iha hala’o observasaun direta ba rehabilitasaun estrada ne’e.

“Iha obervasaun ne’e, Xefe Governu ko’alia direta ho na’in ba Kompañia atu hala’o serbisu extra liután hodi bele halo kaber lalais antes to’o loron serimónia investidura nian ba Prezidente Repúblika foun no Komemorasaun Tinan 20 Restaurasaun Indepedénsia RDTL,” Hatutan.com sita komunikadu hosi Gabinete PM.

Diretór Kompañia Jonize, I Jin Filipe garante ba Xefe Governu katak, antes tama ba loron 19 fulan Maiu, Kompañia sei halo kaber hodi fui alktaraun, atu iha loron 19 Maiu  kalan, bele fasilita movimentasaun  bainaka sira ba fatin serimónia iha Tasi-Tolu.

Iha biban ne’e, aproveita prezensa Vise-Ministru Interiór, Segundu Komadante Jerál  PNTL, Komandante Tránzitu Nasionál no Komandante Munisípiu Díli, Xefe Governu husu atu fó seguransa másimu ba traballadór sira durante serbisu.

Husu mós atu kontrola movimentu rodoviáriu sira no ema fa’an sasan sira besik fatin rehabilitasaun atu labele interrompe Kompañia nia serbisu.

Taur Matan Ruak husu ne’e, tanba bainhira hala’o observasaun iha Sábadu dadeer viajen ba Ermera, haree movimentu tranportes no vendedór sira interrompe serbisu Kompañia nian.

Tanba ne’e, Xefe Governu hafoin fila hosi Ermera tún direta hodi observa no orienta parte seguransa atu haree asuntu ne’e, atu Kompañia serbisu livremente hosi bele termina tuir akordu ne’ebé asina ona.

Estrada ligasaun Tibar-Rotunda Prezidente Nicolau Lobato ne’e, tama iha pakote ida liuhosi Fundu Empréstimu Banku Dezenvolvimentu Aziátiku (ADB) nian, infelizmente rehabilitasaun ne’e to’o de’it iha Terminál Tasi-Tolu nian, no hosi Terminál mai to’o iha Rotunda Prezidente Nicolau Lobato, prosesu libertasaun terrenu demora tebes, no foin iha tinan ne’e mak Governu konsege rezolve hodi indeminiza ona okupante sira besik estrada ninin.

Tuir planu, kontinuasaun obra ne’e sei hala’o iha tinan ida ne’e hafoin Governu preinxe rekizitu balun tán hosi ADB.

Jornalista: Rogério Pereira Cárceres